يمكن أخوية تضمّ كتير بشر ..وبتحسّ انو في اختلافات و مشارب مختلفة ..


بس انو نحن متفقين ....أظن الكل .....انو نحن شباب ..منحبّ سوريّا و البلد ...كل واحد بطريقتو ...بأخلاقو ...بتربايتو ...

يمكن تحسّ انته انو كلام فلان مو عاجبك ....بس لمّا بتعرفو منيح بتلاقي انّو في الاشياء المتفقة معك أكتر بكتير من الشغلات المغايرة و الجانبة لتفكيرك ...

نحن ليبراليين و يمينين و يساريين ...عالاقل هون بأخويّة ....اتفقنا على انو البلد هي بلدنا ....وكلنا منحبّا ...ومنترك كل واحد ليعبّر بطريقتو ....

معك انا ..بتشوف أحيانا في تطرّف بالاراء و الافكار المطروحة ...لكن مجرّد انو الشخص المختلف معك فكرياً ..عقائديّاً ..عمتتقبلو و تقرا مشاركاتو ...بشوفها انو حالة ايجابيّة مثمرة

أنا هاد اللي كنت عم فكر فيه تقريباً وقت بلشت بالموضوع بس يمكن عندي مشكلة بالتعبير عن أفكاري. المهم أنو في شباب بيحبو البلد، كل واحد بيعر عن محبتو بطريقتو، وكل واحد قدراتو مختلفة عن التاني، وفي ناس بتقدم أكتر من غيرا يمكن، بس مو غلط الواحد يقدم حتى شي صغير. مو كل الناس عندا الشجاعة نفسا، بس كل خطوة ولو صغيرة ومحدودة بتفيد إذا كانت مخلصة. في كتير ناس بتخجل من حالا لأنو بتحس أنها جبانة وما بتقدر تعمل متل كريم مثلاً، بس المهم الواحد يعرف أنو مو المطلوب أنو كلنا نعمل متل كريم، بس المهم نعمل شي على أد ما منقدر. مشان هيك في ناس متميزة لأنو عندا القدرة تعمل أكتر من غيرا بس الخطوات الصغيرة كمان بتساعد.

عجبتني هالجملة .....

خلتني أصفن ....

ما يزال من المبكر جدا على الشعب السوري ان يطبق نموذجا كنموذج كريم في المعارضة مع أني أعتبره الأمثل
حيث ان هناك قسما كبيرا من شعبنا لا يزال يظن ان مجرد وصول الماء والكهرباء او الانترنت الى منزله هو مكرمة من النظام وسبب مقنع لاستمرار قمعهم من قبله الى الأبد بدون معرفة أن هذه الأمور من المستلزمات اليومية الطبيعية حتى في أدغال افريقيا ووجودها هو نتيجة للتطور العالمي في كل المجالات وليس مكرمة من أحد
برأيي يجب على كل فرد من أفراد الشعب السوري ان يقرأ أولا ويعلم ما هي حقوق المواطن الطبيعية في الدولة الديمقراطية ومكانته ومن ثم عليه نزع الخوف والمطالبة بهذه الحقوق في دولته الديكتاتورية من اعتصامات ومظاهرات جماعية واضراب عن العمل والمشاركة بشكل فاعل في التعبير عن رأيه في مواقع الانترنت وغيرها

هلق عم حاول اقنع حالي بمنطقية المقارنة بين المثالين اللي طرحتين, بين صاحب موقع كلنا شركاء وبين كريم عربجي, بس ما عم تظبط معي

أول شي ما حدا بيقدر ينكر تميز أيمن عبد النور عن غيرو من خلال موقع كلنا شركاء وخاصة او هو عم يكتب من داخل سوريا و فتح موقعو لبعض الاقلام المعارضة , بس بالنهاية هالهامش الحرية الصغير اللي اخدوا زيادة عن غيرو واضح انو ناتج عن علاقة شخصية بتربطو بناس فوق, كتير فوق يعني بشار الاسد شخصيا والدائرة المحيطة في, و واضح لاي واحد بتابع موقعو انو عم يحاول يوصل رسالة مفادها انو كل شي بهالبلد غلط و الشيء الوحيد الصح واللي فوق اي نقد هو بشار الاسد و من حولو.

هلق هالشي ممكن تسمي انت فن السياسة , بجوز........ بس بالنهاية هو عن قصد او غير قصد عم يساهم بتزوير حقيقة بظن صاروا كتيرين بيعرفوها, وهي انو اللي عم يصير بسوريا مو سببو بس فساد القاعدة وانما فساد الرأس وبالاحرى فساد القاعدة ناتج عن فساد الرأس وليس العكس.

اما كريم وغيرو من الشباب اللي كتبوا بهالمنتدى و غيرو و لسا عم يدفعوا ثمن كتاباتن فهدول اللي ماعندن شي يخسروا اكتر من احساسن بخسارة بلدن , لا هني اعضاء بالقيادة القطرية ولا بحزب البعث ليخافوا على السيارات و البيوت و المناصب اللي عم يستفيدوا منها لحتى يقعدوا يجملوا واقع ما بقى يستحمل تجميل.

كريم كان يكتب بطريقة عفوية بعيدة تماما عن اي حسابات لاي شي و بعيدة عن اي انتماء لاي جهة , وهالشي فعلا هو اللي خلى مشاركاتو متميزة
فيكي تقولي كانت مقفعة معو هو و غيرو لانو كان عم يشوف الامور من منظور سوري وطني بحت, مو منظور طائفي بيخلي يشوف التخلف تحضر بس لانو الحاكم من طائفتو ولا من منظور مصلحي بحت بيخلي يدافع عن اي نظام طالما محققلو مصالحو , مشان هيك ما كان شايف هالخطوط الحمر و اللي عم تصير كل يوم أعرض و أتخن من قبل.




و شكرا الك على الموضوع :D

أنا معك أنو وضع أيمن عبد النور مختلف كتير عن وضع كريم، بس حتى لو كان متل ما عم تقول ، هو شخص مقتنع أنو بهل الطريقة عم يخدم البلد، وعلى حسب ما حكولي أشخاص بيعرفوه شخصياً (على فكرة هو هلأ موجود بالإمارات مو بسوريا) هو هي قناعاتو فعلاً، وكان بيقدر يكون بشي منصب كبير ويحقق مصالح شخصية وبلا كل هالوجع الراس. أكيد الموقع تبعو مو مثالي، وفي كتير أشيا ممكن نقدا فيه، بس بيضل جهد باتجاه ما بلاقيه غلط أبداً، أكيد مانو بمستوى كتير أشخاص تانيين متل كريم، بس أحسن من كتير معارضين كل فكرتون عن المعارضة هو تشويه صورة النظام، بدون ما يقدمو شي للمجتمع المدني اللي تطويره هو أكتر شي بيغير النظام مو أي شي تاني.
يعني إذا الواحد ملاقي حالو مو قادر يغير النظام، مو ضروري يقعد بالبيت يسب وبلعن بس. بيقدر يعمل كتير اشيا يساعد فيها على تطوير مجتمعو على أمل أنو المجتمع بتطوره يقدر يوصل لتغيير النظام.
بتذكر أنو واحد من الآباء اليسوعيين مرة كان عم يناقش بفكرة التغيير (بشكل عام مو تغيير الأنظمة)، وقال شغلة عجبتني بوقتا، قال أنو إذا فيه تيار جارف وقوي وأنت ما عندك الوسائل الكافية لتواجهه وتمنعو من جرف البيوت اللي متجه إلها، فالأفضل إنك تمشي معو وتجرب تحرفو عو مسارو درجة درجة، هيك يمكن ما تكون وقفت التيار بس عالأقل خففت آثارو، وإذا أكتر من شخص عملو هيك فممكن يحرفو الاتجاه لدرجة كبيرة تغير كل اتجاهو.

انا حكيت سابقا
وسألت وياريت اسمع جواب
تغير ضمن الخطوط الحمراء او تحتا
اي تغيير هاد
وشو تعيرفوا
وانو نحنا ما عنا أكتر من الخطوط الحمراا

تشويه صورة النظام!!! مابعرف اذا هي الكلمة "تشويه" بمحلها ,تشويه انا بعرف معناها اختلاق اخبار و تزييف حقائق مو موجودة اصلا

بس يعني لما الواحد بيجيب خبر عن وفاة معتقل تحت التعذيب او اعتقال مواطن والحكم عيه بتهمة اضعاف الشعور القومي بكون ما عم يشوه صورة حدا وانما عم يوصف واقع مرير عم نعيشو يوميا

لما اخبار سيطرة الاخطبوط رامي مخلوف على اقتصاد الدولة على حساب مصلحة المواطن بتكون معبية الدنيا هدا ما اسمو تشويه

لما نحني بكل المجالات متخلفين و مقارنة مع دول مجاورة ومو مع اوربا متخلفين , هدا ما اسمو تشويه

وحتى المدافعين عن النظام لاسبابن الخاصة ما بيقدروا ينكروا هالشي ولهيك بتلاقي اغلبن بيلجأ لاساليب التخوين المعروفة.

حلو هالحكي شو ممكن اي بني ادم سوري وتحت حكم نظام الخطوط الحمراء يقدم للمجتمع المدني؟؟ ليش اصلا بسوريا مسموح الحديث عن وجود مجتمع مدني؟؟ في ظل دولة بتخاف من مواطنيها اذا دخلوا على انترنت كافيه بظن الحديث عن مجتمع مدني هو ضرب من الخيال.



ما حدا سب ولعن صدقيني اذا بتشوفي النقاشات اللي بتصير هون بتعرفي تماما اي طرف هو اللي بيلجأ دائما للسب

انا هون بسالك نفس سؤال زين وعلى امل الحصول على جواب: شلون ممكن نوصل للتغيير ضمن الخطوط الحمر؟؟ وشو نوع التغيير اللي نحني اصلا عم ندور علي؟؟ هل نفس نوع التغيير اللي صار بعهد بشار الاسد , انو صار عنا موبايل و انترنت و الواحد صار يقدر يسافر ويفتح محل بلا موافقة امنية؟؟ هدا هو التغيير اللي رح يخلي مجتمعنا يحط رجلو على اول طريق النهضة؟؟


اي بس الواقع بقول انو التيار هو اللي عم يستفيد من اللي عم يمشي معو و عم يوظفوا لصالح تبييض صورتو و بالنهاية اللي عم يمشي مع التيار عم ينجرف معو وما عم يقدر يغير من مسارو شي.

أنا ما عم فكر من منطلق سياسي بس عم أحكي، يمكن مشان هيك ما عم توصل فكرتي مظبوط، حتى الفكرة الأصلية مو المقصود فيها الناحية السياسية بس، أنا عم أحكي بشكل مجرد، أو فيك تقول بفكرة فلسفية، ما عم حاول لبسّا لأي وضع قائم، بس بناء الإنسان وتطوير المجتمع برأيي ممكن مهما كانت الظروف السياسية، والأشخاص اللي بيحبو بلدون كتار حتى لو مو كلون معارضين أو معتقلين، اللي عم قوله أنو كل إنسان لازم يلاقي طريقة يعبر فيها عن نفسه وعن أفكاره.
الخطوط الحمر اللي قصدتا هي القواعد غير المكتوبة اللي الكل بيعرفوها بطريقة أو بأخرى واللي تجاوزا بيأدي لعواقب مختلفة سواء اجتماعية أو سياسية. في كتير ناس ما عندا الجرأة على كسر هالقواعد، بس أنا اللي عم قوله أنو هيدول الناس بيضل فيهن يعملو شي ضمن قدراتن، يعني ما لازم إحساسن بالعجز عن مواجهة القواعد سواء السياسية أو الاجتماعية يحولهن لسلبيين تماماً وما يعودو يعملو شي.

ليش مضطرين نحنا نعمل متل اللي سبقونا ونسير على طريقهم؟
وادا قصدك عالعدد القليل بيكفي يكون في انسان واحد نظيف الفكر والاسلوب وعندو ارادة وطريقة ناجحة حتى يجمع الالاف وراه بيحلمو يعملو شي ومو عرفانين كيف ومن وين بيبتدو

ادا شفنا ان حتى الخطوط الحمراء التعبانة الحالية في ناس كتار تحت مستواها بكتير ففي مجال للتحسين
بتقدر تغير افكار كتير سائدة مستعملها النظام الحالي بس لو تنشر الوعي اللي عندك على شخصين تلاتة وتوعيهم ولو كل واحد بيعمل متلك رح يتحسن الوضع شوي وبتكون مليمتر في مشوار الالف ميل
مليمتر بس احسن انو نبقى بمحلنا او نرجع لوراء
هاد ابسط متال
بس قناعتي انو نقدر نعمل اكتر

لو اشكال التغير اللي حكيتي عنها ممكنة كان من زمان حالنا تغير

أحيان بقول هيك لحالي، بس برجع بعدين بشوف كتير ناس قدرو يعملو شي ويغيرو حياة كتير أشخاص بدون ما يفكرو بنتايج اللي عم يعملوه على مستوى اوسع، وبيقولو مو ضروري نغير حياة البلد كلا، أنا قدرتي غير حياة شخص واحد أو اتنين، مو غلط أعمل هالشي، احسن من أنو ما أعمل شي، وفي ناس بتقدر تساعد بتغيير عدد أكبر وفي ناس عدد أكبر وهيك، كل واحد بيعمل أد ما بيقدر مو أد ما هو حابب يعمل.
هالموضوع خلاني أفهم مثل الوزنات اللي قالو المسيح، مع أنو أنا وصغيرة ما كان يفوت بمخي أبداً، ورغم أني مو كتير آخدة الموضوع من ناحية دينية بس من ناحية فلسفية وإنسانية صرت شوف هالمثل من وجهة نظر مختلفة.