|
اقتباس:
انا ماني مع ايا انسان بيطلب تدخل خارجي لاسقاط النظام السوري مهما كانت المبررات .. لازم تكون الشغلة من الداخل فقط .. وايا طلب لتدخل امريكي او اوروبي او موزنبيقي بعتبروا نوع من الخيانة ... وليد جنبلاط طلب بشكل واضح من الامريكان يحتلو سورية وكل الناس بتعرف وليد وتاريخو وتقلباتو السياسية وغير السياسية وتغييروا للحلفاء متل تغيير الجرابات . فكيف ممكن واحد الو فكر سياسي يشترك معو بايا موقف ولو رمزيا هي ماني قاردة استوعبها على الاطلاق .. هيدا اكيد لا يعني اني موافقة ع حكي انو يقدم اعتذار وهالحكي الفاضي هيدا كان ينطلب بشكل لدائم من كل سجناء الراي . انو يطلبو عفو واستسماح من شان يطلعو |
اقتباس:
و اقتباس:
|
التعبير عن الخيانة ما اتغير بسورية ...اتغير عند نظام الحكم بسورية وهيدا فرق يعني ممكن نكون انا وانت حاليا كمان خونة حسب التعبير الحكومي الدارج حاليا .. كان القصد من كلامي انو هيدا رايي مو راي الحكومة !! شغلة تانية من شان مثال انفلونزا الطيور وغيروا امثلة هيدا امر ما بيخص داخل بلد معين ( يعني ما بخص الداخل السوري متل التدخل العسكري الخارجي ) لهيك الامرين ما بيتشبهو ببعض
البيان اجا ووقعت الناس عليه بأسوا الاوقات لانو الداخل السوري نتيجة الهجمة ع سورية (شعبا وحكومة من دون تفريق انو هيدا الشعب اكل هوا من هالحكومة ومو ناقصو لسا حدا يزيدها ) اجا كانو تأييد لهيدا الكلام . انا لما انتقدت ما انتقدت فكر ميشيل كيلو او ايا حدا من يلي وقعوا البيان يلي انتقدتوا انو كان لازم يتوضح بشكل كبير انو التوقيع المشترك لا يعني توافق مشترك ع الاراء. ما بعرف اذا وضح كلامي |
اعلان دمشق بيروت مالو صيغة سياسية.. عم يطالب بس بالحفاظ على روابط الأخوة و عدم تمزيقها لأسباب سياسية عابرة..
أما انو جنبلاط صار طفيلي على هالاعلان و وقّع عليه... طيب التافه عبد الحليم خدام حاطط لينك للمنتدى بموقع سوريا الحرة تبعو.. عجزنا بدنا ينشال هاللينك و ما قدرنا... و كان حاطط قصيدة لحسام ملحم كتبها هون بأخوية... طيب هلأ بيضبو بكل اهل أخوية و يحبسوهون لأنو خدام ملاحق؟ شو ذنبنا نحنا هلأ؟ اذا هو تافه و بدو يربط حالو بمجتمع شبابي و ما عرفان كيف شو ذنبنا نحنا؟؟؟ |
ما الكون ذنب بالمرة بس حلو التوضيح لاني انسطلت بالخبر انو اللينك محطوط بموقع سورية الحرة .. بس توضيح من شان الناس ما اتقول ليكو الكل بينشرا.... ( يعني بيندفعلو مصاري ) لانو هي اول تهمة بيحكيها الواحد .. لما بشوف خبر بموقع سورية الحرة وكان منشور بموقع الحقيقة سورية مثلا بعرف انو هي سرقة لانو صاحب موقع الحقيقة واضح برايو تجاه شخصية عبد الحليم خدام .. بتوقع الطلب مو كتير لهدرجة صعب
|
اقتباس:
الخيانة لا تعرّف الا بالخيانة.. فقط هاي متل حالة اعلان دمشق.. هنن ما رادو أي علاقة مع تيار المستقبل من أي نوع.. اجى تيار المستقبل عمل ما يسمى "أمانة بيروت لاعلان دمشق" لاعطاء انطباع انو في معنا ناس من سوريا... اعلان دمشق طالع 3 بيانات ينفي علاقتو مع أمانة بيروت, و عم يطالب بعدم الربط معهون لأنو أمانة بيروت لا تعمل الا على العزف على النغمة الطائفية تبعيت عبد الحليم خدام (التاني كمان مزعوج من انو معارضة الداخل ما حطتو زعيم ) ... و شو عملت السلطة؟ بدل ما تلاقي صيغة تعاون مع معارضة الداخل .. بدل ما تعمل صيغة قانونية لعملهم و تشّرع وجودهم (و بهالتصرّف تنهي أي شرعية أو ذريعة لعبد الحليم خدام و جماعتو.. ) راحت ملاحقتهم و لاحشتهم بالسجون... و بيقولو خيانة.. |
اقتباس:
بتصور انو الفكرة ما وصلتك رح حاول ارجع إشرحها بالأمثلة: بشار الأسد وقع مبارح على اتفاقية الشراكة من أجل المتوسط.. و أولمرت وقع على نفس الإتفاقيه.. هل هالحكي بيعني انو في بيناتهن توافق مشترك على كافة الأراء؟؟؟ وهل يتحمل بشار الأسد مسؤولية تصرفات أولمرت مع العلم أنه لايوجد بند واضح بالإتفاقيه بينص على انو التوقيع المشترك لايعني التوافق المشترك؟؟ هل يجب علينا أن نترك مضامين الاتفاقية و نخون كل من وقع عليها بغض النظر عن مضمونها؟؟!!! حزب الله وقع اتفاقية تبادل أسى مع اسرائيل هل هالشي بيعني إنو حزب الله شريك لإسرائيل لمجرد توقيعه على اتفاقيه معها؟؟؟!!! أما المهم شو مضمون الاتفاقيه و هل هالاتفاقيه جيده بالنسبة للبنان و الشعب اللبناني؟؟ الفكرة يلي لازم توضح انو التوقيع على البيان حتى لو في من ضمن الأطراف أشخاص " خونة عملاء مأجورين" أي شي بدك تسميهن لايعني إنو هدول الأشخاص صارو شركاء... الفكرة الأساسية هي بمضمون البيان... خلينا نقرا البيان و بعدين نشوف هل هناك بالبيان مايسيئ لسوريا أو يدعو لتدخل خارجي من أي طرف بالكون؟؟؟ إذا لقيتي شي بالبيان بيمس بوطنيتنا أو بوطنا فأنا سأكون أول المخونين لكل من وقع البيان.. بتمنى تكون وصلت الفكره. |
اقتباس:
|
| الساعة بإيدك هلق يا سيدي 01:30 (بحسب عمك غرينتش الكبير +3) |
Powered by vBulletin® Copyright ©2000 - 2025, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون