|
مولانا كيفك ....
ايه مولانا العنوسه لنبلش نحكي فيها ..لازم نحكي عن واقع عايشينو اول شي انا ماني مع كلمه عانس ..يمكن هي الكلمه ممكن نقولها ع ايام امي وخالتي وعمتي لما تجوزو بال 14 سنه لان هديك الايام كانت البنت توصل ل 18 وقتها يقولو عانس ... اما هي الايام بتختلف تمام ..وبهل الايام مافيك تقول انه عانس ولعدده اسباب ..للمرحله الي وصلتلها المراه والي في بعض الاحيان ماعاد بحاجه للرجل والاعتماد عليه ...ولتتغير في الحياه العمليه والعلميه للرجل والمراه بنفس الوقت .. فينا نقول تاخير وقت الزواج وانا ماني ضد هل الشي ..صحي الاخير الرجل والمراه يسعون للاستقرار العائلي والعاطقي .بس ماعاد مشكله انه والله المراه اتاخرت بالزواج ...وهون منجي ع الاسباب الي انت طارحها ع التاخير ...عندك اسباب اقتصادي ....وطموحات المرأه بالعمل والاعتماد ع النفس والتقدم العلمي والي باغلب الاحيان الزواج بيمنع هل الشي ..فا صار التأخير ...وعندك كمان العلاقات العاطفيه الي عم تمر بها المرأه والرجل الي عم تأثر ع قرار الزواج ....بعده نواحي ... ولازم الفت نظرك لشغله نسبه الاضرار بالنسبه للتاخر بالزواج ..لا تقارن بنسبه الاضرار بنسبه الطلاق الي عم تصير بالوطن العربي ..والي سببها الزواج المكبر في اغلب الاحيان ..... ولي عوده |
اقتباس:
البنت لما يصير عمرا فوق ال 30 بيتصير خياراتها أصعب وما عاد يعجبها بس الشب الحلو واللي وضعو مرتاح.. بيصير في أمور بتدقق فيها أكتر.. ومنعرف من حالنا أصدقائنا بسن العشرين ممكن ما نكون صادقناهون لو شفناهون بسن ال خمس وعشرين.. يعني اهتمامات الشخص بتتغير مع نضوجو.. وانا بعرف كتير بنات شايلين من بالون فكرة الزواج نهائياً رغم وجود عروض.. |
m
شو هالموضوع اللي بيفتق الجروح هاد يا, وينو زميلنا بالعنوسة الشيخ أبو العبد:sick:
|
اقتباس:
اذا الرجل ضعفت قدراتو شوي مرتو بتكسر عينو وهو بيسكت او بتفضحو اذا اعترض ! من وجهة نظري تاخر سن الزواج بطريقة مبالغ فيها لو اصبح ظاهرة ، يبقى رح تضر المجتمعات الشرقية . |
اقتباس:
كيفك يا حلو , بخصوص التسمية هي تسمية لغوية وكمان اجتماعية ( عجبتنا او لاء ) هاد موضوع مختلف . على كل حال انا اول واحد قابل هالتسمية ع حالي " انا عانس " :o بصراحة مابشوف التسمية فيها مشكلة ، صحيح المجتمع بيستخدم الكلمة ل يعيّر او يسب او يغيظ العانس بس هاد شيئ تاني . المشكلة مو بالكلمة ، المشكلة بعقلية المجتمع الغير سوية او صحية بالتعامل مع الحالة . على كل حال فينا من هون من هالموضوع نحاول نغير الواقع بشيئ بسيط ، لما نسمع حدا يقول النا كلمة عانس ، ما نزعل ولا نتأثر ولا ندايق . بعدين يعني عن تطور المجتمع من عصر جدي لعصر ابي لعصري فهاد موضوع نسبي ، يعني مثلا البنت كانت تتزوج من 60 سنة بعمر 14 و15 ليش ؟ لانو ما كان في مدرسة ولا جامعة . من 30 سنة صار في مدرسة وجامعة وصارت البنت تتزوج عند 21 و22 هلئ صار في مدرسة وجامعة وماجستير ودكتوراة او مدرسة وجامعة و وظيفة ، ليش ما تتزوج البنت عال28و29!! هاد تطور المجتمع ولكن بتضل العنوسة نسبية ايضا ، من 60 سنة ايام ستي كانت العانس اللي توصل ل19 ومن 30 سنة ايام امي كانت العانس اللي توصل ل25 وهلئ العانساللي رح توصل ل31 ! هاد نسبي وبيختلف حسب المجتمع كان زراعي او صناعي او تجاري وحسب مستوى الثقافة والتعليم وكتير عوامل . اما عن اسباب تاخر سن الزواج فانا لهلاء ما طرحت ولا ناقشت فيها ، بكتفي بالنقاش حول الظاهرة بحد ذاتها بهالمرحلة . |
في كتير أشياء بتخلي العازب (ة) انه يطفش من الزواج
مثلاً: ما بشوف غير المتزوجين عم يحكوا : ليش تجوزت ع بكير؟؟ ياريتنا ما تجوزنا .. ياريت بقينا عازبين .. لو كنت بعرف هيك الجازة ماكنت تجوزت. مرة الجاية اذا جينا ع الدنيا مما رح اتجوز. نيال العازب ماعنده لاهم ولاغم.. بأوروبا في نسبة منيحة من العازبين وأعمارهن منيحة بيشتغلوا وبيدوروا .. أنا مابشوف العنوسة عيب أو مشكلة أصلاً في كتير عالم بشوف انه كان مالازم تتجوز لأنه ماخرجها ولا بتعرف تربي ولاد ومع هيك تجوزوا لأنه لازم يتجوزوا...!!!! |
اتاخرت كتير على جماعة الشيوخ والشيخوخات وفتحتو مواضيع كتير بتهمني
رح اعطي رايي باخر موضوع "العنوسة" متل ما قالو البنات قبلي العنوسة بتكون مشكلة للبنت او الشب اللي كتييييييير حابب يتزوج وما صحلو هدول قلبي معهم الله يفرج عليهم اما بالنسبة للباقين يعني اللي عنسو طوعا"مو طوعا طوعا لانهم بيكونو مضطرين كمان ورح اشرح ليش" فتاخر الزواج رح يزعج غيرهم كالاسرة والاصدقاء "متل بحالتي تسعين بالمية من معارفي عملولي درس ومواعظ وحكم لهالسبب" واكيد الو تاثير على المجتمع عموما الظروف الاقتصادية والتغيرات الطارئة على طريقة حياتنا واهتماماتنا واولوياتنا حكيتو فيها وكفيتو ووفيتو رح احكي عن سبب اهم في نظري واعقد"الحب-الصدق-الاخلاص-الوفاء-روح المسؤولية" هدول مابدي قول انقرضو بس صارو عملة نادرة جدا جدا قالولي وقلت لحالي بلاها الرومنسية خلينا نحب بالعقل لكن للاسف طلعت اصعب بكتير قصة الاختيار بالعقل ادا كان الحب بيغطي كتير عيوب فنور العقل مابيخلي شي مخبا وبهدا وللاسباب المدكورة اعلاه كل ما سمعت عقبال فرحك اول كلمة تطلع مني بدون تفكير بعييد الشر عني:lol: وبعيد الشر عن اللي رح يرتبط بيا لاسباب اخرى خلوها بالسر:oops: صحيح الحد الادنى ماديا الضروري لتكوين اسرة مو كتير صعب توفيرو العيب فينا وتفكيرنا وفي استسلامنا للقيل والقال |
انو شو مشان.. وينكوووووووون.. :cry:
|
اقتباس:
|
أثبتت الدراسات العلمية أنو النساء بتكون صحتون أحسن بدون زواج، بين الرجال بالعكس!! المرأة قادرة أنها تعيش لوحدا بسهولة بينما الأمر أصعب على الرجل وخصوصاً كل ما تقدم فيهن العمر. بس المشكلة أنو اجتماعياً هالشي مو مظبوط. بس مع التغيرات الاجتماعية اللي عم بتصير صار في كتير بنات بيفضلو أنو يضلو بدون زواج على أنهن يتزوجو بدون قناعة ومن أشخاص ما بينسجمو معهن.
الزواج المتأخر إلو نواحي ايجابية وإلو نواحي سلبية، طبعاً من النواحي الإيجابية موضوع الوعي والقدرة على الاختيار الصحيح، والتفاهم الأكبر داخل المنزل، بالإضافة لتقليص فترة استخدام طرق منع الحمل السئيلة!! النواحي السلبية فينا نقول أنو الواحد ما كتير بيعود ألو خلق يلعب مع ولادو مثلاً، ووجع الضهر ما بيسمحلو يحملون مثلاً :cry:، بالإضافة للمشاكل الصحية اللي ممكن تأثر على الحمل والولادة وصحة الجنين مع تقدم الأم بالعمر، بس هي حالات مو كتيرة وممكن تلافيها بالمتابعة الصحية الجيدة. |
اقتباس:
من الاول قلت انو هادالموضوع الكن ..النا .... اللي على بالو موضوع نتناقش فيه كلياتنا يحطّو .... اللي عندو مشكلة و حابب يطرحا هون و ياخد رأي الشيوخ كمان مرحّب جداً ..... وبكل الاحوال ببالي قضية و بدّي أطرحها ...بس لـ أنتهز الوقت الملائم ..... |
اقتباس:
مثلاّ بنعرف شخص تجوز بال38 سنة ...بعد سنتين لبين ماجاب الصبي ...يعني بينو وبين ابنو 40 سنة ....اي والله كتيرة ....أديش هاد الزلمة رح يواجه صعوبة بالتفاهم مع ابنو لمّا بيكبر ويصير بمرحلة المراهقة ...أديش رح يكون في حاجز و مسافة عمرية بين ...خلينا نقول ....3 اجيال تقريباً ...ممكن رح يعاملو كـ جد الو .. مو أب |
هلأ الشغلة إيجابية بنواحي وسلبية بنواحي تانية، يعني فرق العمر الكبير بين الأب والإبن بيفيد بأنو خبرة الأب بالحياة بتكون أكبر وبالو أطول وغالباً ما بيعصب بسهولة قد اللي عمرو أصغر. بس طبعاً قدرتو على فهم جيل ابنو والتغييرات باهتماماتو بتتطلب منو بذل مجهود أكبر ليواكب العصر اللي عايش فيه ابنو. يعني متل كل شي بهل الدنية في سلبيات وفي ايجابيات وكل حالة وإلها خصوصيتها.
|
اقتباس:
|
ضغط العمل!!!
شيوخنا الاعزّاء , بحب أوجه تحيّة لالكن بمناسبة انتهاء فترة السبات الخريفي وبهي المناسبة , نقف دقيقة صمت لارواح الشيوخ اللي الله افتكرها , ومندعي بطول العمر للباقيين :lol: اليوم عندي موضوع ...شائك شوي ..وبيهمّ الشيوخ و بيهمّني شخصياً و حابب اسمتزج أراء الزملاء فيه ----------------------------- ضغط العمل كتير من طلبات التوظيف اللي بنصادفها بجريدة أو باعلان توظيف ..سواء داخل القطر أو بالغربة ...القدرة على تحمّل ضغط العمل اللي ملاحظو ..بحكم خبرتي بمجال العمل ..سواء لمّا كنت موظف ..ولا بالادارة..انو كلمة ضغط العمل كلمة مطّاطة كتير و بتحمل أكتر من معنى و أكتر من هدف ضغط العمل ممكن يكون ساعات طويلة من العمل , أو مسؤوليات كتيرة , أو قدرة على التعامل مع أكتر من جهة , أو كلّن مجتمعين كيف بتشوفو الموضوع ..؟ :D |
أكيد كل الأشياء اللي ذكرتون بيشكلو الضغوطات اللي الإنسان لازم يتعامل معا، والقدرة على تحمل هالضغوطات بتختلف حسب درجتا وحسب استعداد الإنسان إلا وحسب قدراتو، أكتر شي بيشغل ضغط أنا بتصور حسب تجربتي المتواضعة، هو المسؤولية، يعني أديش فيه مسؤولية بتوقع على عاتق الشخص نتيجة القرارات اللي بياخدا بيشغلو، والأصعب طبعاً المسؤولية اللي ممكن يتحملا نتيجة أشياء خارجة عن سيطرتو.
أنا اللي خلاني أترك الشغل أنو بتوصل لمحل إذا بدك تتقدم بتحس حالك عم تتورط، يعني بشغل الدولة أحياناً الوصول لموقع مسؤولية هو ورطة، لأنو بتعرف حالك أنو شو ما عملت ممكن يجي مين يتهمك سواء بالتقصير أو بالرشوة أو بالتواطؤ، وهاد اللي شفتو صار بكتير ناس كانو بمواقع مهمة وأنا بعرف كيف كانو عم يشتغلو وبعرف الأشياء اللي عملتلون مشاكل وبعرف أنو ما كانو بيقدرو يتحكمو فيها. طبعاً القدرة على التعامل مع هيك أوضاع وعدم الانهيار تحت الضغوطات الخارجة عن السيطرة هي موهبة مانا موجودة عند كتير ناس ولازم الواحد يفكر منيح ويكون عارف التضحيات اللي بدو يعملا لينجح بهيك جو عمل. |
اقتباس:
بصراحة من يومين كان في جلسة عمل مع بضع اشخاص من ذوي الفعاليات الاقتصادية ....وكان الحديث عمبيدور عن هموم و مشاكل الموظفين ...اتّفقو ...في شبه اجماع...انو لمّا بيتحمّل الموظّف ضغط العمل ...رح يكون انتاجو و محاكمة الامور عندو أفضل ...سواء كان باتخاذ القرار الصائب ...او رفع سوية الانتاج شو رأيك بهالحكي ؟ |
اقتباس:
يعني ممكن يمرفترة فيها ضغط وتعب ودوام طويل ومهام كتيرة. لكن لو استمر هالوضع لفترات طويلة ممكن انو ينعكس سلبا على نفسية الموظف ومن بعدها رح يتاثر أداؤوا بالشغل. أولا وآخرا الازمات والضغوطات هي يلي بتبين المعدن الجيد للموظفين لكن الاستمرارية بتعمل مشكل. :D |
| الساعة بإيدك هلق يا سيدي 02:39 (بحسب عمك غرينتش الكبير +3) |
Powered by vBulletin® Copyright ©2000 - 2025, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون