انا ما كنت بدي شارك بهي اللعبة .... و بس شفت اسم الحكيم محطوط بالمقلاية و ما حدا عم يسأل ... قلت رح بلش انا مشان شجعكون .....

بس ما بعرف اذا الحكيم رح يكون عندو الوقت ليرد على الموضوع ... على كلن انا رح حط أسئلتي مشان خلي بقية الأعضاء تتشجع .......

الأسئلة:

1. ليش الأرقام على التلفون بكونو من تحت لفوق (1 بعدين 2 ... 9) و بالآلة الحاسبة بكونو بالعكس يعني من فوق لتحت (9 بعدين 8 ... 0) ؟؟؟؟

2. فيك تبكي تحت المي (ماء) ؟؟

3. ليش في خطوط سود على طابة الباسكت بول (السلة) ؟؟

4. ليش في صور للشمس و هيي حاطا نظارات شمسية .. و الغرض من النضارات الشمسية انو تحمينا من أشعة الشمس ؟

5. مين هوي أول شخص قال " انو أول شغلي رح تطلع من تحت الدجاجة رح آكلا " ؟

6. مين هوي اول شخص قال " انو انا رح إعصر البقرا و رح إشرب السائل يلي رح يطلع منها " ؟؟

خلصو الأسئلة تبعوتي ...

يا عيني عليك يا غود فاذر :ok: :ok: :ok: :gem:

شو ياااااااااااااا :o ما حدا عم يتجرأ يفرجينا مراجلو و يييييييييييييييين الأسئلة:o ؟ :lol: :lol: :lol:

صرنا باليوم التاني هلأ بنزل أنا زخ بأسئلتي هه 8) يالله تشوف وييييييييييييييييييين ؟!!


وين الشبيحة وين :clap: :clap: :clap: :metal: :metal: :metal: 8) يفرجونا حالون شاطرين علي بس:tomtom:

اوفففف شو هاد لك انشتاين ما ابيعرف ايجاوبك......بس الحكيم رح يعرف...;-)

له له شو اصدك والله رجاع المسا لمطر بالاسئلة طول بالك....:tears:

قولك رح يعرف يجاوب ؟!!!

بعدين تعا لهون ... انت لازم تجاوبني ليش في خطوط سود على طابة الباسكت بول (السلة) ؟؟

عاملي حالك لاعب سلة مخضرم .. و يا أرض اشتدي ما حدا أدّي !!! جاوب على هالسؤال و ببصملك بالعشرة ...

أي رح نشوف 8)

هلا انا بعرفوا بس رح شوف الحكيم شو بدو ايجاوب وبعدين انا بقلك....:tomtom:

حكيم ..
أهلا و سهلا بالقسم عنا ..
اي خيو ... كام سؤال هيك عالماشي ..
شو أكتر لون لكزلك النضارات بتحبو 8) ؟؟ و ليش :p
شو هدفك بالحياة ؟ زمين مثلك الأعلى كمان بالحياة (( غير انت ذاتك ))
شو رأيك الشخصي بكل من الأعضاء التالية
كريم بو
سيمون
سويت بيبي
بلو ايز
ليلى
صياد العصافير عفوا الطيور
SABE
فارون
ماهر
طارق
هير اي ام
هنون
كاكا بودو
سيريا مان
ويلي
مايويا
جيني ...
بعتقد بيكفي هلأ هدول الأسئلة .. و على فكرة لازم اليوم المسا أو بكرا المسا تجاوب .. لأنو اللعبة هاي بدها تتحول لطريق ثانية .. نفس المبدأ بس على إسلوب شوي مختلف ..

سلامات حكيم ..

مرحبا حكيم ...

ليش ما عم نشوف مشاركاتك بالاخوية ؟؟؟

ازا حبيت تكمل دراسة طب و تخصتص ... شو الاختصاص يللي بتفضلو و ليش ؟؟؟

سمعان بلعبة اسمها abalone ؟؟؟؟ عازمك ع دق تكسير راس

لو كنت عضو عادي بالاخوية .... شو هيي اكتر اقسام كنت رح تشارك فيها ؟؟؟

حكيم أذا خيروك تسكن ببلد لآخرتك اي بلد بتختار ..
شو رأيك بلبنان ..
لو ما كنت دكتور شو كنت بتحب تصير ؟؟
حاجتك :D

مرحبا حكيم :D
سؤال واحد بس شو هوي مرض DIC

قريب على الأزهيمر الله لا يوريك ياه :tears:

حكيم ...
معليش إسا سؤال ... خبرنا عن أول إيميل عملتو بحياتك ..

حلو شباب يالله حموها شوي :lol: :lol: :lol: :p كمان


أي سؤالي للحكيم المحترم بسيط وسهل جداً :


بشكل مختصر وبسيط مم تتألف القنبلة الذرية و ما مبدأ عملها ؟


و ع راسي أحلى دكتور :D :D :D

هلأ فينا نسأل هيك اسئلة ؟؟؟؟؟؟؟

طيب مزال هيك يا حزرك مين اجا بالاول الجاجة لما البيضة ( مع تحياتي لديموزي الغائب)

:p لك سهلة شبك حدا ما بيعرف مبدأ عمل القنبلة الذرية :o :p :tomtom: :lol: :lol: :lol:

لكان لشو أسما مقلاية ؟ ;-) بعدين الحكيم رح يعرفا ع الطاير هلأ بتشوف ;-)

شاطر تقللي براءات اختراع وما بعرف شو :tears: :waa3: بدي مية سنة لعددلك ياهون هدول :tears:

سؤال البيضة والجاجة ألي ؟ أذا إلي ماعاد فينك تسألني :p خلص دوري :tomtom: ;-)

لا السؤال للحكيم ...

لكان بس شاطر انت تسألني كيف بدي اعرفك بنص عجقة القصاع :jakoush:

طيب سؤال كمان للحكيم ....

خوش ما كان الجواب صحيح اول مرة

ازا هانز راكب بالقطار معو سبع نسوان كل مرا معها سبع عربيات ولاد كل عربية فيها سبع بنات و كل بنوتة معها سبع لعبات .... كم زلمة رح راكب بالقطار ؟؟؟

فيك تقول بسرعة ( بس بلا زوغلة) "خشبة الحبس حبست خمس خشبات و خشبة من الخمسة ما انحبست:p

لعما أنا جربت خبشت مدري خربشت مدري خشبشة الدنيي بوشي :shock: :shock: :shock: خششبربشتشخمس شووو :waa3: :pos:

حكيمنا كيفك
بدي اسألك شو اكتر شي بتقرا (يعني اي مجالات) ومين بشدك من الكتاب اكتر شي
شغلة تانية لمين بتسمع اكتر شي ( أغاني وموسيقى ) :D

مرحبا حكيم شو الاخبار خيو سؤالي شو اصعب موقف واحلى موقف اتعرطتلون بحياتك واول ما بلشت اخوية حست انو رح ينجح الموقع او لاء...:D

هاي حكيمنا كيفك
شو اخبارك
هلا اسئلتي
1. انا ليش بخاف منك؟
2. شو لونك المفضل؟ وليش؟
3. و بتامن بالابراج و الغيب؟ وليش؟
4. شو امنيتك بالحياة؟

يلا حاج هدول سلام:D:D

الدكتور حسام المحترم كيفك ؟؟
شو الفكرة الاساسية يلي عم تحاول تبني على مبدأها المنتدى ؟؟؟
بس سلامات

مرحبا يا جماعة .. انا خبرت بأني بالمقلاي البارح المسا واليوم انشغلت بالموقع _شوية تصليحات_ لهيك
1- اسف على التأخير _ان كنت قد تأخرت بالرد
2- ححاول جاوب هلق على الأسئلة الي اتسألتها او على الزيت الحامي الي كان عم يندلق علي
3- الله ولي التوفيق _اذا بدك_

اي اجيت انا


حكيمنا بونجور
اول الشي مين اكتر عضو بيعذبك بالمنتدى

مين اكتر مشرف بديئلك خلائك

شو بتحب بالصبية لي ممكن تكون ملكة القلب ولئيتها اي اولا ء:p

من زمان هل الشي بيصير معك

سلامات حكيم ...

راضي عن أخوية حالياً .... و إيمتى كانت أحلى ايام حياتك..!!

تحياتي

ما بعرف الإجابة على اي من هال الأسئلة وبشك انو في اجابة صحيحة ووواحدة لبعضها..

هاهاهاها .. تسالي .. والله على حسب السوق من سوق ..


بفضل طبقو عوض عن الكلام عنو.. _بشكل عام انا ميال للعمل اكتر من ميلاني للحكي_
بس اذا بدي نظّر شوي .. واحكي عن شوية اهداف .. ممكن هال الحظة اول شي خطرلي هوي حمص،
دمشق هي عاصمة سوريا، حلب هي عاصمة سوريا الإقتصادية_نظريا_، بطمح ان تصبح حمص عاصمة سوريا التكنولوجية ومنها عاصمة العرب واكثر_

التكنولوجية_ يعني شي متل وادي السيليكون.. تبع سوريا والعرب واكثر.. (هذا طبعا هدف على الصعيد البيزنس خلينا انقول) وهدف ضيق طبعا

.. لكن هذا اول شي خطرلي بهال اللحظة ..
في اشياء كتيرة بتتمحور معظمها حول سوريا بس ما في وقت للخوض فيها هلق .. وبرجع بقول بفضل العمل على الكلام..


لا مثل اعلى في حياتي.. لكن هناك اشخاص تعجبني جوانب من شخصياتهم او جزء من تجاربهم بالحياة وبجرب استفيد منها..

فمثلا تفتنني تجربة كمال اتاتورك، وتجربة الحبيب بورقيبة، وتجربة الشيخ زايد ، كما تفتنني كاريزما الإبتسامة عند الشيخ حسن الترابي و توني بلير، وبتعجبني

كاريزما الرصانة عند الأمير سعود الفيصل و عند الرئيس بوتن، و كاريزما الجنتلمان الزكي عند كويزومي و برلسكوني.. و و و.. الخ ..

رأيي الشخصي/ طبعا صعب كتير قول رأي الشخصي (سلبيات - ايجابيات) على منصة متل هاي هون!!
فيني احكي بالإيجابيات فقط.. وهو ما سأفعل.

كريمبو: - الكاهن -|بيزكرني جدا بكهنة الهيكل في الأساطير الفرعونية|_ليس لهذا الوصف مدلولات عقائدية وانما منطقية فقط_ وعندو قدرة جيدة جدا على حمل اكتر من بطيخة بفرد ايد، غير هيك .. ملكات الإدراك والتحليل عندو متنامية جدا..

سويت بيبي: - حزب آخر العنقود - بشكل عام حزب آخر العنقود بيكونو مهضومين، طيبين، واكبر من عمرون.. وسويت بيبي هيك ++ قوية _او الي هوي قد حالها_

ليلي: - الست - ايجابية جدا، مخلصة، ذات افق بالنظر.. رجليها على الأرض _واقعية يعني_ وهذا شيئ رائع..

SABE: - بكرا - كل ما بتزكر سعيد بتفائل_بتفائل عامة وبتفائل فيه خاصة_ ، بحسو بيشبه بكرا، فيه شغلة ظريفة كمان بسعيد الي هيي حاسة
الشم!! .. سعيد بيشم الأشياء النضيفة والأشياء المنيحة شم، يعني بيتزوق الجمال جدا، جمال الكلمة، واللحن، والفكرة، جمال البعد الآخر اذا بدك ..

كاكابودا: -الله التسالي -(روقات سفن أب).. صعب فصل ابو جريج عن كلمة "تسالي" _بمدلولها الحلو_، وانا شخصيا اتعلمت من ابو جريج شغلة بحبها كتير الي هيي السخرية من كلشي ما بيعجبنا حتى حالنا.. يعني معالجة الأشياء الي بتزعجنا بالسخرية منها، غير هيك ابو جريج حساس _وهاي
بعتقد غير ظاهرة عليه للوهلة الأولى_ بس للوهلة التانية فيك تلاحظ جدا مدى رهافة حس وعفوية ابو جريج..

Here I AM : - شيخ الشباب - بمجد شغلة كتير ظريفة هيي الإبتسامة، الإبتسامة عامة حلوي وابتسامة مجد تحديدا كتير حلوي!..
بيعطيك جرعة من التفائل + والأهلية لمن بتحكيه بطريقة سلسلة جدا .. وهاي ملكة مهمة كتير، الي هيي الحضور الأهلي..

Hanone : رقيقة، حساسة، طموحة، فيها شي ظريف الي هوي الإتقان او السعي ليه .. بتحب تعمل الشغلات بدقة او بكمال معين.. وهذا بتقديري بينبع من الإخلاص وهيك ..


اما عن الباقي فما بعرفهم بالقدر الي بيمكني اعطي رأيي..

في اكتر من سبب..
1- الوقت .. دائما في شغل بالموقع .. (او على الأقل الفترة الأخيرة ).. سواء شغل تقني او شغل دعم، يعني الي بدو يغير والي بدو يشيل والي بدو يحط الخ .. لهيك ما بيضل عندي وقت _او دائما مكسور بالوقت_ ولو اني كتييييييييير مشتاق لإكتب واقرا .. وداقت خلاقي من الشغل التقني الناشف

2- حاولت لفترة طويلة الفصل بين العضو Dr_HUS والمشرف، او الإداري او التقني او او ...
بس فشلت .. واليوم لمن بدي اكتب رح يؤخذ كلامي كرأي الإدارة او موقف الموقع من مقال او شخص او حدث معين .. بالوقت الي انا كتيييير بميز بين شخصي كعضو وبني قادم وبين شخصي كمدير، بمعنى اني مثلا كمدير ما بينفع سب اي شخص او اتعامل بسلبية مع اي كان، بالوقت الي انا كبني ادم في ناس بحبون وفي ناس ما بحبون _ بالتالي كبني آدم كمان بسب وبعيط وبصرخ و غيرو .. وهذا كلو ما بينفع اعملو لانو حيؤخذ كموقف الموقع وهيك .. وقيس عليها

بالغالب ححاول ما كفي بدراسة الطب، يعني بدي اتخرج ووقف (ممكن اختص في حال كان الي بالي يعني ظابط ) ما بعرف الموضوع شوي شائك بس بعد تخرجي ما حيكون الأولوية لمتابعة دراستي بالطب البشري والإختصاص حتكون ملحقة بمشروع آخر اذا نفعت معو كان به ما نفعت به لا بأس ..
اما عن الإختصاص ... كمان محتار بس بشك عام ان اختصيت حبني قراري بشو بدي اختص على شكلي الأحق وكيف بدي ياه يكون ..
يعني انا ما بحب وقتي يكون ملك لشخص آخر .. والطبيب بالعموم وقته ملك المريض .. بيتصل فيك الصبح بالليل بعد الضهر.. يعني وقتك ملك المريض.. وهذا شيئ ما بيواتيني ولا بيواتي صحتي بنوب.. لهيك ان كان رح بختص + اشتغل بالطب حيكون اما
عينية، او اشعة، او جراحة تجميلية (بالغالب)
في اشياء بتناغشني كمان وبتصب بنفس الغرض (طب نووي، طب شرعي وسموم) ..

اما العينية فوقتها منظم جدا نادر يجيك حدى باليل يابا بدو نضارة او هيك، الجراحة التجميلية منظمة الي حد ما بس فيها طوارء الي هوي قسم الحروق، الأشعة = بيزنس لا اكتر ولا اقل .. --> مركز وموظفين وعمل منظم جدا .. وبينشق منها كإختصاص جديد الطب النووي..
الطب الشرعي والسموم .. عم فكر فيها لأسباب استراتيجية هاهاهاها (متل ما بيقولو) يعني فرصة للإنخراط بوسط صعبت تنخرط فيه بغيرها، وضروري تنخرط فيه ..

هاهاهاها .. بعرف اللعبة بس ما لعبتها ولا مرة .. شفتها اول مرة بالصيف بمشتى الحلو بعيد السيدة كنت عم بتمشى مع الشباب ولقينا شاحنة وناس عم يلعبو وعجبتني فكرتها كتيييييير .. كنت بدي اشتري وحدة بس طلب حقها 3الاف مدري 3900 .. ما بزكر .. لهيك استغليتها وقتها وما اشتريتها ومن وقتها ما عاد صحلي لا اشتري اللعبة ولا اتعلمها .. بس عجبتني كتير فكرتها وناوي اتعلمها و اقبل عزيمك ع ال abalone

حلو هال السؤوال

لو كنت عضو عادي كان اكتر قسم رح اقرأ به هوي "عالطاير" و "كريكاتير" بحيث اني بحب افتتح نهاري بشيئ حلو دائما .. انا بشكل عام اول ما فيق اول شي بعملو بعد ما غسل وشي، بشرب ميي كتير _لاني بكون عطشان الصبح دائما_ وباكل حلويات سواء شرقي او شوكولا او عسل الخ ..
ضروري هذا قبل ما اعمل اي شي .. بعدها اباشر نهاري بفتح النت (مشترك بشوية مواقع اجنباوية بتبعتلي كركتيرات ونكت) هاي اول شي بفتحو الصبح وبعديها اباشر الأعمال.. سماع الأخبار، الشغل، المواقع وهيك ..

طيب قلنا على الطاير و كركتير هوي كان حيكون اكتر قسم بقرأه .. بس اكتر قسم ممكن شارك فيه بالكتابة كان حيكون بالغالب "السياسة"، "المنبر"، " الإقتصادية"، " البسطة"..

منيح انك حصرت السؤال بالأخرة فقط..
لو خيروني او لم يخيروني لن تكون أخرتي غير بحمص!!



يا زلمي شو هال السؤال الصعب!!.. رأيي بالوضع الحالي للبنان، او رأيي بالبنانية وتعاطيهم مع الوضع الحالي، او رأيي بلبنان كوحدة مصير..
طيب..
دام السؤال بالعموم ما حقدر جاوب غير بالعموم ..
لبنان بلد شقيق
لبنان احدى اقاليم سوريا الكبرى
لبنان احدى ولايات الوطن العربي الكبير

ومكانتها بالنسبة الي تتوازى وما ستقدمه لي ولشعبي فقط، متلها متل غيرها،

اما لو قصدك شو رأيي بلبنان كتسالي ..
اي رهيبة يعني .. قريبة عضة كوساي وبتكون بنص كازينو دي ليبون خخخخخخخخ:gem: .. عضة كوساي وبتصير بنص الكسليك وخود على تسالي يا حبيب.. هاهاهاها :tomtom:

انا قبل ما اطلع على القاهرة لدراسة الطب (يعني بعد البكلوريا)..
كان خياري الأول اني سجل علوم سياسية واقتصاد دولي وفعلا رحت سجلت وعملت فحوصات المقابلة بتفوق وغيرها وغيراتها .. بس كان العقبة الأخيرة اني كنت انا نصير بالحزب و لحتى ادخل كان لازم كون عضو عامل بالحزب!!!!!!!.. وعليه ما قدرت سجل.. واهلي رفضو يسفروني وعلى قولة الماما يدفعو عليي بالدولار كرمال ادرس علوم سياسية، لهيك ما كان امامي غير الطب _على حسب رغبة العائلة_ يعني فيك اتقول غلطة ..
بس انشاءالله ما حنتمادى بالغلط اكتر من هيك و انشاء الله بالقريب العاجل حنحط حد لهال المهزلة الي احنا فيها

شو خطرللك؟
طيب ال ال DIC الي هوي disseminated intravascular coagulation ..
ما كتير هلق انا حاضر بزهني تفاصيل المرض .. اعراضو ومضاعفاتو الخ.. غير هيك انا ماني شاطر بالحكي الطبي بالعربي.. بحيث ما بعرف اسماء الأشياء او المصطلحات الطبية العربية ما بعرفها لهيك ممكن احكي اشياء انا اقصد شيئ واستخدمت مصطلح تاني.. المهم سيدي
بإختصار هيك هوي متلازمة (المتلازمة بتختلف عن المرض بأن المتلازمة هي مجموعة من الأعراض و المضاعفات) المهم هوي متلازمة ناشئة عن جلطة عامة systemic يعني مش متوضعة بمكان بعينه . (جلطة او تجلط داخل الأوعية اقصد).. وعليه هال الجلطة المتنقة ممكن تعمل انسدادات بأوعية لأي من الأعضاء بالتالي تبطلت تشتغل _dysfunctioning_ للعضو .. وبنفس الوقت ممكن يكون هذا السبب يعني عدم عمل عضو من الأعضاء ممكن يعمل التجلط هذا وهيك .. عرفت كيف
بشكل عام هوي اكتر شي بيجي مع الي بيكون عندو sepsis الي هيي بعتقد بالعربي تعفن او تقيح او هيك شي..
اخيرا هيي متلازمة خطرة ونسبة النجاة فيها مش كبيرة كتير .. طبعا كلو متوقف على الأعراض او الأمراض المصاحبة وشدتها..

----------

هاهاهاها .. :lol:
من 6 سنين عمل اول اميل او بيجوز هاي اول شغلة بعملها كانت بالنت .. وضليت كذا يوم عم فكر شو بدي اعمل اميلي ..
ما كنت بعرف انو بينفع اعمل اكتر من ميل ولا كنت اصلا اتخيل انو الوضع هيك حتى اني ما بنسى يومها لما اطلعت من الكفي نت كنت حاسس حالي رح بخبط

بالسما.. ويا ارض اشتدي اشتدي انا عندي صار اميل وما حدى قدي.. هاهاهاها:gem:
يا المهم بعد طول تبصر قررت يكون الميل بالأحرف الأولى الي هوي H_M_ABBOUD @ Hotmail
بعدو عندي الميل لهلق بس قليل استخدمو ..
بعدها لمن عرفت انو الميل ببلاش وهيك وصار يجيني اميلات كتير قمت عملت اميلات مرقمة
huasm__archive1@hotmail
Husam_archive2@hotmao.
الخ هيك .. كل شوي كنت اعمل ارشيف جديد.. بحيث ما كنت حب احزف الإميلات وخاصة لمن كان لسا النت ما بعرف فيها شي غير الإميلات والفوروردات وهيك .. فكنت احتفظ فيهم .. فلمن كان يمتلي الميل كنت اعمل فورورد لحالي من اميل مثلا h_m_abboud ->> husam_archive كرمال فضي ميلي الأساسي بس ضلني محتفظ بالإميلات القديمة وهيك شغلا ت..

تسالي هديك الأيام كانت رهيبة..

ضربت على الوتر الحساس من حيث لا تدري..
بيجوز انت طرحت السؤوال من باب التسالي او من باب التخويت هاهاها

بس الحقيقة ان لي باع طويل في التقصي في هذا العلم ..
اقصد المفاعلات وتخصيب اليورانيوم والإنشطاريات (القنابل النووية) والإلتحاميات(القنابل الهايدروجينية) الخ ..
سواء القنابل هنا او المفاعلات .. حتى لي باع طويل في كل علوم الطاقة والطاقة البديلة والنظيفة وغيرها ..

خليني بركي اذا صحلي اليوم بكرا بحط موضوع مطول عنها .. او بركي بعد ما خلص هلق الردود هون بحط موضوع مطول عنها .. بحيث الحكي بإختصار ما بينفع بهيك شغلات ..


مجلات لا اقراء _بإنتظام_ سوى newsweek arabic .. بشكل منتظم.. بوقت سابق ولفترة طويلة بيجوز اول 3 سنين من وجودي

بالقاهرة كنت منتظم على روز اليوسف بس بعدين بطلتها لضيق الوقت ولان اهتماماتي صارت اوسع من المحليات المصرية ..

هون في نصفين، شو بحب وشو بسمع .. لاني ما بسمع شو بحب وما بحب شو بسمع .هاهاهاها ++ انا بحب اغاني وبسمع اغاني وليس مطربين ..
عموما انا بحب الجبليات، _الأصوات الجبلية_ فارس كرم، وائل كفوري، نجوى كرم، عاصي حلاني، وهيك كل الشغلات الجبلي والدبكات وهيك .. (بس ما بسمعها كتير منشان المود)
بس بسمع فيروز، الست، ماجدة، كونشيرتوات، (هذا من ناحية السمع الدائم يعني)
اما ليش في خلاف بين شو بسمع وشو بحب .. لانو بغير المود تبعي من خلال الأغاني.. يعني لو انا وعم اشتغل اسمعت من المطربين الي بحبون كتير ابطل اعرف ركز بالشغل، وهيك .. لهيك بسمع شغلات على هوى شو بينفع وشو لازم اسمع وليس شو مشتهي اسمع هاهاهاها:o


في مواقف صعبة ومواقف حلوي وصعب اتزكرون او ازكرون هلق لهيك ما في مجال جاوب..

اما عن بداية اخوية وتوقع النجاح، مان بالعموم ما حدى بيبلش مشروع وهوي عندو اعتقاد انو يفشل المشروع !! هيك بالعموم يعني ..
اما بالخصوص فانا بالتحديد بكره الفشل وبخاف منو كتير لهيك بكون كتير حريص بأي شي بعملو اعملو على اكمل وجه او على الصورة الأكمل بحسب طاقتي و قدرتي و الإمكانيات المتاحة بوقت عم بعملو..
اخوية اليوم منيحة كتير .. بس مافيني قول انو نجح المشروع.. لسا الطريق طويل .. ولساتنا لهلق بالتأسيس

هاهاها سؤال صعب

الأزرق بشكل عام والسماوي بشكل خاص وكل الألوان الفاتحة او الألوان الي فيها حياة واكره الألوان الأسود .. ماعندي ببيتي اي شيئ لونو اسود غير كندرة رسمية وكام اندروير خخخخخخخخ :p

ما بآمن فيهم بس كمان ما بكزبهم .. يعني انا ما بعتقد فيهم لكن بعتقد بوجود اشياء فوق الطبيعة او فوق مستوى ادراكي و بعتقد كتير انو تأثيرها بيتوقف على الإيمان بها.. اقصد هنا الي بيآمن بالأبراج فعلا بتظبط معو الأبراج مو صدفة لا حقيقة وناتجة عن ايمانو.. وهيك ..
يعني بإختصار انا صحي ما بآمن فيها ولا بصدقها بس بآمن انو الي بيآمن فيها معو حق او على الأقل بتكون واقعية وحقيقية و منطقية وبتظبط معو فعلا و نسبة تحققيها بتعتمد كليا على درجة ايمان الشخص فيها .. مو اكتر

انو اتبطلي اتخافي مني هاهاهاهاهاها ..


---------
مافي ولا حدى بيعذبني !! بس بيجوز في كتير انا بعزبون :lol:

ولا حدى .. بس في اوقات بيصير انو الحكي بيصير مانو على نفس الوتيرة مو اكتر..
وهون ما بتدايق من المشرف وانما بتدايق من الوتيرة الي ما عم نلتقي عليها ..

يووه كتير شغلات انا كثير التطلبات هاهاها :lol: .. بس على رأس القائمة اتكون زكية
اما عن لقيت ملكة القلب او لاء ...هلق انا من ناحية ما عم دور ومن ناحية تانية لمن بدور ما بدور على ملكة القلب وانما ملكة العقل :o ..

غير اني لساتني صغير على قولة الماما ههههههههههههههههههههههههه هههههههه :lover:


----------

لاء مو راضي .. بس بالمفهوم الإيجابي.. بحيث الرضى يعني الإستكانة والسكينة والقناعة والقنوع .. وهذا بيهبط العزيمة وبيخلينا نبطل شغل..
لهيك انا مو راضي عن اخوية وانما راضي عن مقدار التحسن الي عم بيصير بأخوية وعن مسيرة العمل الي فيها ..

احلى أيام حياتي ما اجت لسا!! ..
بس بما مر من حياتي كان احلى الأيام هيي ايام البكلوريا كان عنا جرعة من الجرئة كبيرة كتييييير ..مع شيئ من الإتكالية في كنف الأهل ..
شيئ منفتقدو لمن كبرنا .. صار كلشي بدو يكون محسوب وصار المسؤليات واقع مضطرين نعايش معو ..

مشكور حكيم على الاجابات الحلوة....

مشكووووور حكيمناا
بس ماحطيتلنا شي حدا بالمقلاية :gem:

بس لهلا ماجاوبت عالسؤال:jakoush::jakoush:



هي شغلتك مو شغلتي:p:p

سمعتو انا اخر العنقود ولازم تديروا بالكن عليي:gem::gem:
بس انا قوية و الله حرام عليك:angel::angel::angel::angel:

باك، ما بعرف انو لازم حط حدى بالمقلاي؟؟
طيب عموما فهمت انو بدكم اتسكرو اللعبة او هيك .. ما بعرف؟

بالنسبة لماهر هاي الرد على جوابك

- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا -

تبع القنبلة النووية

شو بلشة الحرب :devil: :o

حكيم اشلون يعني بدنا انسكر اللعبة..؟؟؟

اي فارون مارح تتسكر بس رح يتغير مسارها متل ماقال ابو السوس هون

- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا -

بس كيف ماتسألني لانو مابعرف
بس اكيد شي حلو متل ماعودونا الشباب :gem: :gem: