الانظمة الحكومية الاربعة باليونان القديمة [الأرشيـــــف]

عرض كامل الموضوع : الانظمة الحكومية الاربعة باليونان القديمة

Willi

29/10/2006, 09:25

يعتقد انو باليونان اتأسست 4 انواع من الانظمة, اي كانت بدايتها باليونان, طبعا هية انظمة معروفة بوقتنا هاد.

بتبدا بالنظام الملكي "Monarchy"
بيتبعو الاوليغاركية. "Oligarchy"
بعدين الحكم الاستبدادي. "Tyranny"
واخيرا وليس اخرا الحكم او النظام الديمقراطي. "Democracy"

رح حط بهالموضوع شرح بسيط عن كل نظام بيتبعو تاريخو وشلون بدي وشلون انتهى (طبعا هالحكي باليونان, يعني شلون بدي وشلون انتهى باليونان).

رح ينحطو كل كام يوم نظام

الرد التالي رح يحكي عن النظام الملكي

Willi

29/10/2006, 09:37

23790

الحكم الملكي:

معنى الكلمة:

هي نوع من الحكومة, فيها بتكون السلطة بايد شخص واحد بس. اغلب الحكومات الملكية بتكون محكومة من قبل ملك, عادتا بمساعدة مجلس مرشدين.
الكلمة "الملكية" او (monarchy) اجت من اليونانية mono (تعني منفرد) و arkhein (تعني حكم).

تاريخ النظام:

المسّينيين, اللي حكمو اليونان القديمة من 2000 ل 1100 ق.م., كانو محاربين عملو النظام الملكي ليحكم ممالكون. ملك كل مدينة عاش بقصر شرح وكبير (متل عنا المسؤوليين الله يزيد مصرياتون) بعاصمة المدينة. غير العاصمةكان في مجموعة متفرقة من الضيع. سكان هالضيع كانو يدفعو الضرائب للملك, يتبعو قوانينو, ويعتمدو عليه لحمايتون. الملك عادتا اعتمد على جنود مسلحين بشكل تقيل لحتى يحمو ملكو, ويلمو الضرائب من الناس, وينتبهو انو هالناس عم تنفذ القوانين. عادتا الملك احتفظ بسلطتو لمدا حياتو (يعني لحتى مات). ابنو الاكبر – الامير- كان يورثو على العرش. لاكن وقت ما كان يكون في ذكر ليورثو, كانو اقرب المرشدين العسكريين للملك, يتقاتلو بين بعض ليصيرو الملك الجديد.

الملكية المسّينية ضلت موجودة لحوالي 1200 ق.م. بهداك الوقت الكتير من طرق التجارة الشرقية بلشت تتسكر بسبب القتال بين الممالك باسيا الصغرة.
كنتيجة لهلشي, المسّينيين ما عاد قدرو يجبو معادن خامة, وقدرتو ليعملو السلاح ويحتلو اراضي تانية, انعدمت. فالمسينيين بلشو يتقاتلو بين بعض مشان يقدرو يعيشو, وببطئ دمرو بعضون. بالنهاي ناس من الشمال الغربي سميو بال "دوريين" غزو اليونان ودمرو اللي كان باقي من الملكية المسينية. الحكم الملكي كنوع من الحكم اختفى من اليونان. واتبدل بنظام جديد فيه بكون في عدد من الناس بيتقاسمو السطلة بين بعضون وبيحكمو كمجموعة.

يتبع النظام الاوليغاركي.

Euphoria

29/10/2006, 09:46

يعطيك العافية على الموضوع بصراحة اسلوبك خفيف و سهل وفي نفس الوقت قدرت توصل المعلومات بشكل سلس و سريع يا ليتك درستنا التاريخ.
Happy Holidayz to you:D

Willi

29/10/2006, 09:51

:lol:

مشكورة.
طبعا نحن ما بدنا ندحش المعلومة دحش براس الشخص اللي عم يقرا. الفكرة انو الواحد ينبسط بالشغلة هو وعم يقراها. ويعرف الشي المهم عنها.

ما بدي اكتب موضوع طويل عريض يقوم الواحد من اول ما يتطلع فيه ينجلط ويسكر الصفحة :lol:

اهلا وسهلا وفيكي نورتي الموضوع
وهابي هوليديز تو يو توو

Euphoria

29/10/2006, 10:00

اكيد اسلوب طرح الموضوع يأثر على المستمع او القارئ وانا انشديت للموضوع كعنوان و بصراحة كنت اقول لو طلع موضوع ممل رح اقفل الصفحة بس الحمد لله موضوع رائع و اسلوب اروع ويعطيك العافية:D

Willi

29/10/2006, 16:35

يا ميت اهلا وسهلا :D

Willi

30/10/2006, 06:56

اليوم كنت عم بحبش على شغلة بالانترنت قام لقيت خريطة للعالم, محطوت فيها البلدان اللي بتستخدم هالنوع من النظام (الملكي)

البلدان اللي بتستخدم هالنظام, ملونة بالازرق.

الصورة من موقع ويكيبيديا
وانعملت ب نيسان 2006

رح حط اللينك بس لانو الصورة كبيرة, ما بدي ياها تنزع الصفحة

////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

marioma alghzayala

30/10/2006, 11:21

والله شي حلوو هااا ... يللا اشليف اللي بعدو ...وثانكس جووووووج :D

Willi

31/10/2006, 07:39

هلا مريوم, يلا اسلقي

Willi

31/10/2006, 07:44

24006

الحكومة الاوليغاركية

معنى الكلمة:

الاوليغاركية (حكم القلة) هية نوع من الانظمة, فيها بتكون سلطة الحكم بايد عدد قليل من القادة. الكلمة "اوليغاركي" او "Oligarchy" اجت من اليونانية oligos (تعني "قليل) وarkhein (تعني "حكم").

تاريخ النظام:

بين 1100 و 800 ق.م. مجموعات صغيرة من الناس بلشو بسلطة سياسية كانت باغلب الاحيان موزعة بين ارسطقراطيين, ورثو ثروة وقوة من عيلتون, و الملك. مع مرور الزمن, التنظيم تبع الحكم تغير. الاوليغاركية تطورت, بحيث انو صارت السلطة السياسية مع مجموعة من الاغنياء تم اختيارون. بعض اعضاء دائرة الحكم كانو ارسطقراطيين من ولادتون, بينما البعض الاخر كانو اثرياء من الطبقة الوسطى.
متلها متل الحكومة الملكية, الاوليغاركيين عاشو حياة مترفة (يعني كانو معون مصاري ويصرفو كتير) وكمان كانو يفرضو حكمون بواسطة الجيش. بالنسبة للمواطنين, الحكومة الاوليغاركية كانت مئمنتلون الحماية الكاملة, لاكن ما كان عندهون اي حق سياسي, متل التوصيت. (نحن عايشي بنعمة, منقدر نصوت, صحيح ما حدا بياخد باصواتنا, بس بالقليلة عم نصوت).

مع مرور الوقت, حكومة القلة (الاوليغاركية) بلشت تتلاشى باليونان لاسباب كتير. بمدينة Corinth كمثال, رغم انو المواطنين عاشو منيح, بس الاوليغاركية حكمت بشكل قاسي, قامو الناس اسقطوها. بأثينا, الاستياء من الحكومة زاد كتير, خصوصي بعد ما صار نقص الاكل شي عادي. سلطة الاوليغاركيين كمان ضعفت لما مجموعة من الاغنياء جمعو جيوش من ناس مأجورين (يعني دافعينلون مصاري), او محاربين اطلع عليهون اسم الهَبلِبت (hoplite), واستخدموهون ليخوفو قادة سياسيين. وقت اجت سنة 400 ق.م., ما كان في حكومة اوليغاركية مستقرة باليونان كلها, الا مدينة وحدة بس, هي اسبارطة.

يتبع الحكومة الاستبدادية

ghazool

31/10/2006, 10:30

رائـع :D ..

suryoyo

02/11/2006, 00:49

موضوع رائع و مفيد جدا

ان شاء الله اكثر و اكثر

Eh@Ab

02/11/2006, 13:36

مشكور:D ويعطيك الف عافية :hart:

Willi

05/11/2006, 07:03

24571

حكم الاستبداد:

معنى الكلمة:

الاستبدادية هية نوع من الانظمة فيه بتكون السطلة بأيد شخص استولى على الحكم, غالبا بطريقة غير شرعية.
الكلمة الانكليزية للاستبدادية (tyranny) اجت من اليونانية tyrannos, اللي بتعني "مغتصب مع سلطة عليا". مع مرور الزمن انعرف عن الحاكم الاستبدادي, انو استخدم قوتو بطريقة هيك يعني بشعة, وقاسية.

تاريخ النظام:

النظام الاستبدادي باليونان طلع بالبداي سنة 600 ق.م. بكتير من المدن, حيث انو عدد اعضاء الطبعة الوسطى, والتجار, والعمال اللي ما كان عاجبهون حكامون تزايد كتير. الطبقة الوسطى كان بدها امتيازات سياسية واجتماعية مشان تتماشى مع الغنى تبعهون, بس الحكام الاوليغاركيين, رفضو انو يعطوهون دور بالحكومة. فعدد من الاشخاص – غالبا قادة عسكريين سابقين- ردو على الطبقة والوسطى ووعدوهون انو رح يصير التغيير اللي هني بدهون ياه. فبدعم من الطبقة الوسطى هالاشخاص استولو على السلطة من المجموعة اللي كانت حاكمة. وقت كانو بالحكم هالقادة –الاستبداديين- عادتا اعادو اصدار القوانين, ساعدو الفقراء, لغو الديون, وعطو عالم غير النبلاء كلمة بالحكومة (يعني صار يطلع صوتهون). مكافئة على هالشي, هالناس عطو هدايا للاستبداديين, اللي صارو كتير اغنية بسبب هالشي.

العديد من الاستبداديين حكمو لفترة قصيرة. ببض المدن الطمع والقوسة عمو قلب الاستبداديين, وصارو العالم يعملو انقلاب عليهون. اخر استبدادي مهم باليونان كان هيبياس, الي كان بمدينة اثينا. بسنة 510 ق.م. مجموعة من الاسبارطيين والاثينيين, اللي كانو مخالفين لقسوتو بالحكم, جبرو هيبياس انو يستقيل ويطلع برات اليونان. نظام جديد –فيه كل السكان كان الون يد بصنع القرار- حل محل النظام الاستبدادي.

يتبع النظام الديمقراطي

meYnot

05/11/2006, 10:20

يسلموا على الموضوع الحلو..
شكراً لك وللبساطة في نقل المعلومه ...

Willi

11/11/2006, 12:17

هلا معلم.

اسف هالتأخير بس انشغلت شوي.

هلق رح اكتب عن النظام الديمقراطي.
بدي شي نص ساعة وبخلصو

Willi

11/11/2006, 13:16

25257

الحكومة الديمقراطية:

معنى الكلمة:

الديمقراطية هية نوع من الأنظمة الحكومية فيها بتكون السلطة بايد كل الناس. الكلمة ديمقراطية اجت من اليونانية demo (بتعني "الشعب") و kratos (بتعني "حكم").

شوي عن النظام:

الديمقراطية انعملت باليونان بسنة 500 ق.م. بمدينة تسمى اثينا, اللي كان فيها الناس معارضين الحكم الاستبدادي. عن طريق شخص اسمو كلايستنيس.
هو كان بزماناتو قائد لاثينا. لاكن انطرد من الناس اللي فيها (مع مساعدة من اسبارطة). وطلع برا اثينا. لكن لما الناس داقت خلاقون من حكم الاستبداد. رجعو قالولو يجي. لما اجا على اثينا فكر بالموضوع انو الناس ما عجبها هالنوع من الحكومة لازم اعمل نظام جديد يكون فيه كل الناس بتقدر تمارس حقا بالحكم.
وهيك اجتو هالفكرة.

اهم هيئة حكومية بديمقراطية اثينا كانت مجلس الشعب, كان المجلس مفتوح لكل ال 30,000 حتى 40,000 الف مواطن ذكر بالغ (الاناث ما كان مسمحلون انو يشتركو فيها), لاكن عادتا 5,000 بس حضروه (للاجتماع يعني). الهيئة اجتمعت حوالي 40 مرة خلال السنة ليناقش السياسة الخارجية, يراجع القوانين, و يتناقشو بالشؤون الداخلية. اعضاء المجلس كان ياخدو قراراتون عن طريق المناقشة و التصويت.

كان في هئية تنفيذية اصغر من الالوى لاكن مهمة, هية مجلس ال 500, كان هالمجلس عليه تسيير الحياة اليومية للدولة -هالهيئة اللي كانو اعضائها يتنقو سنويا عن طريق القرعة- اقترحو قوانين جديدة, وخلو الناس تنفذ قرارات المجلس. المجلس كمان كان يدير الشؤون المالية للدولة, يلتقى مع السفراء من باقي الدول, ويشرف على بقاء, تنظيم وتحسين الجيش والاسطول الاثيني.

جانب مهم بديمقراطية اثينا كان انو الشخصيات العامة ما كان الهون سلطة كبيرة لشخصهون. ما كان في شي اسمو رئيس باثينا. بوقت الحرب كان مجموعة من 10 جنرالات يقررو شؤون الجيش. هدول الجنرالات كانو ينتخبو سنويا وكان ممكن ينتخبو عدة مرات. تقريبا كل الي بيشتغلو بالحكومة – معهون الجنرالات, واعضاء مجلس الشعب, و اعضاء مجلس ال500, والناس اللي خدمو بهيئات المحلفين) كان يندفعلون مشان خدماتون. هالشي خلا كل من الفقير والغني تنيناتهون يشتركو بالحكومة الاثينية.

COSTA

14/11/2006, 02:23

أسير التشرد

14/11/2006, 02:38

هلأ خيو ممكن سؤال ؟؟؟
انو انا شفت بالصورة دولة باللون الازرق وهي كندا
طيب شلون هي مملكة؟؟؟؟؟
خيي كوستا هي كندا تعتبر تحت التاج الملكي البريطاني ... متلها متل استراليا ونيوزلندا ...
وفي عنا مندوبة من قبل الملكة البريطانية اسمها ميكائيل جان ...والخلاصة انو كندا هي ملكية بنظام لقب الحاكم...

ولاحظ التاج البريطاني بالشعار بكندا
////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

COSTA

14/11/2006, 02:49

خيي كوستا هي كندا تعتبر تحت التاج الملكي البريطاني ... متلها متل استراليا ونيوزلندا ...
وفي عنا مندوبة من قبل الملكة البريطانية اسمها ميكائيل جان ...والخلاصة انو كندا هي ملكية بنظام لقب الحاكم...

ولاحظ التاج البريطاني بالشعار بكندا
////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

ايواااااااااااااااااااااا اه
يعني تعتبر من دول الكومنويلث
مشكور خيو على المعلومة :D
وانا اسف جاد لانو طلعنا شوي برات الموضوع :D

Willi

14/11/2006, 02:56

بالفعل كوين اليزابيث تعتبر ملكة كندا.

هلق للصراحة ما بعرف ليش.

بس مشكور عالملاحظة كوستا.
ومشكور اسير عالرد.
اذا حدا بيقدر يشرحلنا الموضوع يا ريت.
بس طبعا مو هون

vanina

14/11/2006, 12:32

يعطيكي العافية
اسلوبك كتير حلو .....
:D

Willi

14/11/2006, 15:05

يعطيكي العافية
اسلوبك كتير حلو .....
:cry:

يعطيكي؟؟

لك
والله انا شب

اهلا وسهلا مشكورة عالمرور

COSTA

14/11/2006, 15:16

لك
والله انا شب

:lol: :lol: :o :o

اي اكيد ..............

مغرم سوريا

14/11/2006, 21:28

شكككككككككككككككككككككككك كككككرا :D
تحياتي