شوية قصائد عامية لطلال حيدر [الأرشيـــــف]

امرأة من ورق

26/05/2006, 07:38

يارايح - غناء فيروز

يا راعي القصب مبحوح
جايي ع بالي شروقي

قلّو للقصب ما يبوح
بالسرّ اللي بعروقي

وإن ضعنا سوى بهالليل
خلّي صوتك مسموعي

يا رايح صوب مشرّق
شرّق ما بو ربيعي

راحوا يرعوا غنمهن
والعشب فوق ضلوعي

وإيّام الـ غابن ولفي
لعدّن ع صابيعي

وعتّم علينا يا ليل
وضيعي يا حلوة ضيعي

قالولي إنّي عشقان
وأني مش داري بحالي

بين الصاحي والغفيان
لمحت خيالك قبالي

كان الصبح شنّو بان
وآدان الصبح عالي

ونازل من صوبن مرسال
من عيني نزلوا دموعي

امرأة من ورق

26/05/2006, 07:39

قصيدة فخار

نيال فخارا لهالجره

فرحان عندو عيد

بيشرب ع طول نبيد

سكران عمرو ما صحي مرّا

ومدري خدودو ليش محمرّا

تخمين بوّس شي مرا سمرا

تمّا غفي عا تمّ هالجره

امرأة من ورق

26/05/2006, 12:54

حبّ

خدني معك يا حب، شي مشوار

وع السكت وشوشني، سرار سرار

محّي لأيامي بايديك الزغار

مدري شو صابو، هالعمر

فتّح وصار قمار

يا ريت هالعمر الهرب

يرجع ونحنا زغار

لا بعود اقرا بها الكتب

ولا بعود عمّر دار

بقشّقش حوالييّ حطب

وبشعّل بها النار

امرأة من ورق

27/05/2006, 06:41

وحدن- كمان غناء فيروز

وحدن بيبقو متل زهر البيلسان وحدهن بيقطفو وراق الزمان

بيسكرو الغابي بيضلهن متل الشتي يدقوا على بوابي على بوابي

يا زمان يا عشب داشر فوق هالحيطان ضويت ورد الليل عكتابي

برج الحمام مسور و عالي هج الحمام بقيت لحالي لحالي

يا ناطرين التلج ما عاد بدكن ترجعو صرخ عليهن بالشتي يا ديب بلكي بيسمعو

وحدن بيبقو متل هالغيم العتيق وحدهن وجوهن و عتم الطريق

عم يقطعوا الغابي و بإيدهن متل الشتي يدقوا البكي و هني على بوابي

يا زمان من عمر فيي العشب عالحيطان من قبل ما صار الشجر عالي

ضوي قناديل و أنطر صحابي مرقو فلو بقيت عبابي لحالي

يا رايحين و التلج ما عاد بدكن ترجعو صرخ عليهن بالشتي يا ديب بلكي بيسمعو

امرأة من ورق

28/05/2006, 12:13

ركوة عرب -غناء مخول قاصوف وبعدو مارسيل خليفة

أحلى من الركوه
على منقل عرب
أحلى من الفنجان
حلوه
متل عُبي القصب
خيط القصب تعبان
جيبوا حدا من دمر
يدقدق وشم
جيبوا من الهامة
والوشم
بن محمّص وهب الهوا شامي
غمازة لعالخد
ماإلها إسم؟
والخد قدامي
ومكحلي ...
والكحل راسمها رسم
مين لبرا قلامي
ومشنشلي متل الفرس
والسرج خيّالي
بإيدا أساور من دهب
بتخش
بتخش؟
بيدور الطرب ليوم القيامة...

امرأة من ورق

02/06/2006, 09:17

قومي اطلعي ع البال

قومي اطلعي عالبال
بِغيبتِك نزِل الشتي
قومي طلعي ع البال
في فوق سجادة صلا
والعم بيصّلوا قلال
صوتن متل مصر المرا
وبعلبك الرّجال
ع كتر ما طلع العشب بيناتنا
بيرعى الغزال
وَدّيت مع راعي حماه
يشفلي الطقس شمال
قللي السني جايي هوا
بيوَقّع الخَيّال
ياريت
ما سرجت الفرس
ولا بْعَتْ هـ المرسال

butterfly

02/06/2006, 11:47

يا من حلب

يا من حلب
يا من الشام
هالحنة شمالية .....
حنيت ايديك
يا بو خطوط محنية
بيلبقلك التوب
والشملة الشامية

لك سحاب سيفك وغني
بتلبقلك الغنية
مكتوب ع السيف
والكلمات كوفية
مكتوب حبيت
الباقي حروف ممحية .........

امرأة من ورق

03/06/2006, 06:11

مية وردة لعيون فراشتنا:سوريا: :سوريا: :سوريا: :سوريا:
اخيرا حدا جبر بخاطري ونزل معي شي قصيدة

امرأة من ورق

13/06/2006, 06:27

قطفولو ورد

متل ها النسيان جايي من السهول
الحب.. متل الموت
وليالي الضيعة بين الحجار تقول
رح يوصلّون هالصوت .. ؟
تحت الشتي عم ينحنو يقطف وراق النار
ابكي عليهون يا عتبة الدار..
قوليلهون فلو قوليلهون ضلو.. والليل بيفتح قمار قمار
والفلاحين الطالعين من الندي بيرنخو.. أرض المنام الباردة..
بعدون عا الورقات زخات الشتي
فرو هاالعصافير وضل لحالو يغني الزمهرير
قطفولو ورد للنسيان
الموت عم بيشكشك وراقو عا شريط الزمان .
هل كان عندون بيت ..

وصورة عليها ناس معلقين بخيط
وقعو عن سطوح العمر وسلقتون الحجار
وقعو متل ما بيوقع المشمش عا الولاد الصغار
وين أهلي وين طاحونة حزن خيي الصغير
وين طيارة ورق نومي عا هزت سرير
وين الأيدين الحطت بريق الشتي فوق الحصير
وين اللقي راسو عا أيدي وصفن .. وطلع وعلى كتير
وين شبابيك الي فات منها الصوت متل الزمهرير
وين .. رمان السقف مقطوف ومعلق متل عمر الكبير
ولك عن يا قلبي متل ها النحل جوات القفير
وقع العمر ما بين أيد وبين هزات السرير .

امرأة من ورق

09/07/2006, 07:36

مينن هن

لبسو الكفافي ومشوا
وما عرفت مين هن..
ماعاد رح يرجعوا
ياقلب حاج تعن
لاحصان جايب حدا
ولا سرج عم بيرن
لك ضحاك
سنك دهب
خليه يبان السن
خليك متل القصب
كل ما عتق بيحن
يابن اسمك حلو
سميت حالي بن
رد العباية القصب
ع الكتف
محبوبي
والعين قوس القدح
وسيوف مسحوبة
راحو
لبسوا العتم !
قامات مهيوبة
ناديت
بالله رجعوا
ماتلتفتو صوبي

امرأة من ورق

01/10/2006, 10:55

عتمة خياله

لو كان عندي فرس
لضلّ عالعالي

بس ندهيني
بنزل على خيالي

يا بنت راعي الغنم
هالموت مقبالي

ردّوا معي البواب
جايي هوا شمالي

في ناس
قالوا قتل

في ناس
قالوا مات

في ناس
قالوا فتح عتمة خياله
وفات

سرسورة

02/10/2006, 02:36

يسلمون يا امراة الورق...يا أذوق امراة من ورق.....
:D :D

امرأة من ورق

02/10/2006, 06:35

يسلمون يا امراة الورق...يا أذوق امراة من ورق.....
:D :D

شكرا كتير سرسورة
:D :D

امرأة من ورق

02/10/2006, 06:38

نون.. إلى فيروز:hart:

مشتاق
إيديّي غمر مفتوح متل النون
معجّل
متل جملة ما فيها سكون
ولا بنهدى
والوقت ما عنده وقت ينطر حدا
يمكن أنا مجنون

هيّ ِ
متل شي خط بريشة قصب
وهوّ ِ
متل حرف العرب
مرفوع بالضمة

منصوب بالفتحة
وبالفتحة هرب

بس يكتروا ببالُه
بيصير واو ونون
وبس يسكن بحاله
بيصير همزه
أو بيصير سكون

قرآن مفتوح بهدا
متل المصلاّية
نقّوا شي سوه هينه
تنبلش قرايه

وعبله على ضهر الفرس
حلوه متل آيه

كل الحروف منكسّه
إلا الألف رايِه
ألله شو حلوه الألف
بس تنحكى حكايه

سبعه لغات العرب
عندي مخباية
ع كتر ما القوس انحنى
صار السهم غايه
هـ الأرض
اسوارة دهب
زينه مضوايه

جبلي بطريقك حلق
إدني.. معرّايه

وصيت صايغ حلب
قللي الحلق جايي
وضاعت
يا مين يلاقيا
وياخد هـ المرايه...

امرأة من ورق

03/10/2006, 15:42

مَ دام

مَ دام
نوم ولادهن طيّر ورق بالسهل

مَ دام
ما عاد بدهن يخلوا الصبي
يدقدق جراس النحل

مَ دام
إيديكِ البيوت الفاضيه

مَ دام
ما بَقْ في حدا
غير القفاص العاليه
وغير الصدى

مَ دام
إيديكِ السهول

مَ دام
بس تلململي دَيْكي

بيتلملموا طراف الحقول

مَ دام
مهما قلت
رح أسكت ع طول..
ما عاد بدي قول

امرأة من ورق

06/10/2006, 18:50

فوق

كان في غصن بردان
ع مرجة هلي
سألتن لمين الطقس
قالولي إلي...
وطلعت اتفقد إذا ردوا البواب
وبقيت فوق
وما حدا قللي نزلي

سرسورة

07/10/2006, 17:45

فوق

كان في غصن بردان
ع مرجة هلي
سألتن لمين الطقس
قالولي إلي...
وطلعت اتفقد إذا ردوا البواب
وبقيت فوق
وما حدا قللي نزلي
:cry: :cry: :cry:

امرأة من ورق

13/10/2006, 05:39

:cry: :cry: :cry:

اخيرا حسيت حدا متفاعل مع الموضوع :D

والقصيدة الاخيرة عن جد:cry: :cry: :cry:

امرأة من ورق

13/10/2006, 05:40

سهيان

كان الطقس سهيان
ما بباله حدا
متل اللي قاعد ع الهوا
يتذكر النسيان

وما ضل في غير الزمان
وصندوق فرجة
وكل ما مرق فرجة
بيقولو كان...

aleya

13/10/2006, 06:08

عنجد القصائد كتير حلوين..
شكرا الك:D

امرأة من ورق

13/10/2006, 08:34

عنجد القصائد كتير حلوين..
شكرا الك:D
العفو
واهلا وسهلا فيكي:D

سرسورة

14/10/2006, 02:43

اخيرا حسيت حدا متفاعل مع الموضوع :D

والقصيدة الاخيرة عن جد:cry: :cry: :cry:
يعني اذا هيك موضوع الواحد ما تفاعل معو..مع شو بدوو يتفاعل؟؟؟
بس مع هيك كلام..صعب الواحد يلاقي حكي دايما....
:D :D :D :D :D

امرأة من ورق

22/10/2006, 10:33

مي

كتبوا تاريخ المي
على ذاكرة الينابيع
كيف بدا المي تضيع
...

في نجمه بقيت لحالا
ما عرفت ترجع
لو ما تطلع مقبالا
بالمي وتلمع..

امرأة من ورق

11/10/2007, 17:16

سجر البن

بيني وبينك سجر البن
وحبّ الهال
وزهر النوم

بيني وبينك تسع جبال
وعرب وصحرا
وغيبة يوم

بيني وبينك ضربة رمح
وفرس وسيف
وهجم الصبح

بيني وبينك طيرة طير
ونادو كلّن ع الفراق
وقطفني متل الصبيّر
صوت الغنُّو بالعراق

لو نقدك كان مدينة
وبالشام العرس
لاركب ع الفرس وجبلك
مفتاح القدس

رايح اسرقلك غابة
واسرقلك جان
وعلِّق ع سجر البحر
عقود المرجان

nasoura

17/10/2007, 17:05

تسلم ايدك على هالكلام الحلوووووووووو

..AHMAD

03/08/2008, 21:04

الشاعر اللبناني المتميز "طلال حيدر" برغم انو الفصحى دايماً فيها معاني اقوى من العامية .. إلا انو طلال حيدر .. قدر يغير هالنظرية بتجمع أشعاره بين البساطة والصدق وجمالية الموروث الشعبي كتب عن الحب، عن الوطن، عن الفرح والحزن رسم أحلى اللوحات هون شوية قصائد الو... غنائية .. وغير غنائية :D

..AHMAD

03/08/2008, 21:09

قومي اطلعي عالبال

بِغيبتِك نزِل الشتي
قومي طلعي ع البال
في فوق سجادة صلا
والعم بيصّلوا قلال
صوتن متل مصر المرا
وبعلبك الرّجال
ع كتر ما طلع العشب بيناتنا
بيرعى الغزال
وَدّيت مع راعي حماه
يشفلي الطقس شمال
قللي السني جايي هوا
بيوَقّع الخَيّال
ياريت
ما سرجت الفرس
ولا بْعَتْ هـ المرسال

--------------------------------------------

طقس

بيتي
متل ورقة احترق
ما عاد عندي أهل
شبهتك بهاالسهل
بقرص العسل
عملو ع مهلوا النحل

شبهتك بحالك
بالعمر
ماشي وراك يلملم خيالك

وجك طقس متل الصحو
دايخ ومش سكران
متل الشتي
نازل على حزيران
شبهتك بقوس القدح
جايي على لبنان

وجِّك وطاف النيل
غرق مصر
في مملكة عم تنسرق
مفتوح باب القصر

وجك
من هون بيحدو الشتي
ومن هون حده التلج

وشاعر
حمل حاله بها الموت وحده وهج

شبهتك بكل الدني
من بعدك عليها السلام
بس تفرحي
بيطير من صدري الحمام
وبس تزعلي
ع مصر باخدلك الشام

..AHMAD

03/08/2008, 21:22

حزن المدينة - ديوان " آن الأوان"

أوعا تسمّوها
بتحزن ميدنه
بيوقع أدان العصر

و بينسرق سيف النبي
و ما بيلتقى بمصر

إنت الشام مزيّنة
و إنت قواس النصر

وقفوا العرب ع سلاحهن
لمن فردت الشَعْر ..

تمنيت حالي دهب
تاصير متل الشام

و تغار مني حلب
وما عود فيي نام

هـ الموت ع ضهر الفرس
مارق بها الأيام

و الناس
ع كتر النعس
كل ما مرق بتنام.

..AHMAD

03/08/2008, 21:24

ريش نعام

حلوة متل طلّوا العرب
رح يوصلوا عَ الشام

وجِّك قبيلة بَيْعَدِت
ما وصلا الاسلام
وجِّك متل حقلِة قمح
نيّال يلّي نام

دقّوا مهابيج البكِي
وهْدُولْ يا طير الحمَام

بينَاتنَا..
قوس القدَح منصُوب متْل خْيَام

ومِن فَوق قوسِك يا دِني
عمْ توقَع الإيَّام

بيناتنا..
قولة غِفي
والموتْ ريْش نْعامْ

سلّم عَ موتك يَا هلي
بيطلعلنا نودّي سَلام

خلص الّي بَيني وبَينكُن
عم شوف متل مْنَام

جْمَال وبَدُو رح يِرحَلوا
وبِحْكِي..
ومَا بيطلَع كَلام!

..AHMAD

03/08/2008, 21:27

الله الله - ديوان " آن الأوان"

بتلبقلك المي
لا تموتي
اْغرقي بالمي
تيصير موتِك نَعَس
وتْصير
شمسِك فَيّ
وجّك جنازة
والملك مقتول
والعسكر قبالي
في ناس
عم بيحوربوا بقصر الملك
وفي ناس
ع العالي
خوفي عليكِ تكبري
و خوفي على حالي
رح تنزل عليّ الدني
و يتغرّق خيالي
ون كان
لا بد وغنى ورح ترحلوا
محّوا الطريق
مرسوم ع الحيطان
ولد حفيان
راكض بالحريق
قومي نعسيلُه يا دني
بلكي إذا نْعستي
بيفيق
يللي نطرتُه رجع
طلع الصبح صبحين
شمّيت ريحة علي
قالوا
مرق الحسين
جيبُه بيارق كربلا
وسماع ملّا آه
فردوا البيارق بالهوا
قال الهوا
ألله
ألله .. ألله
فتحلي درفتين الـ هـَ
وخللي الهوا
يختم ألف باء الهوى
بالـ هـَ
وجّك أدان الصبح
و الفاتحة اسمِك
والـ تا المربوطهْ
شريطهْ على رسمِك
وبتقول خبّيني؟!
بخبيكْ ما بين الحمد و الفاتحة
بغطّيكْ بالرحمن
من بعد ما بإيدُه
رفع للمي
بكربلا
تيشرب العطشان
قلّلا لها الميّ نزلي
من سورة الرحمن
ليش هيك صرتي كتار
وبعدِك ما حدا
وحلوه ..
مَرّه متل هـ الصيف حفيانِهْ
ومرّه متل شي بلاد كسلانِهْ
ومَرّه
متل غمِّض وقبل ما تفتِّح اْنساني
أول ما شفت النهر عمبيطوف
عرفت أيَّ منام
بدي شوف

..AHMAD

03/08/2008, 21:32

قصيدة لطلال حيدر .. إلى زياد الرحباني
إذا بدا لكم أن الصوت بعيد
فاحذروا
أن يؤذن له بالدخول
وأنتم غياب
كان جميلاً ككنيسة شرقية
مزيّنة بصياح الديك.
حكموا بالنفي على جميع الأحزان
فطارت يمامة من القلب
وتزينت الأيام بنهار الجمعة..
كان صافيا كجميعكم لم يعد أحد يضع بين يديه صينيّة الفصول
يا حزيناً كغربة إلى الأبد
الأرض تدور مرة واحدة .
ذهب الوقت الأول
لا أحد سوف يكشف السر.
الزمن السعيد
الحاضر المزيّن بمجيئك فجأة
الماضي الداخل إلينا منذ لحظة
في طريقه إلى المستقبل
الضعفاء يضعفون لأنهم لا يعلمون
كم ستكون جميلا طيلة أيام الصيف.
يداه مطبقتان على نجمة
والنجمة فرحانة كنقطة تفرّ عن السطر.
الانتظار يسرق الإيمان
لكن إيمانه سرق الفاجعة..
الذي لا يموت
لا يمكن إلا أن يكون وحيداً.
طوبى للذين يموتون
البزق يقيم لك قدّاساً في ساحة القلب
الريح وحلفاؤها يناولونك القربان المقدس
وأنتِ
وحيدة بين النساء.
من أين نأتي لكِ بهذه الأحزان مرة ثانية ...

achelious

03/08/2008, 22:51

يسلمون زعيم, لسا ماقريتن كلن
بس يعطيك العافية:D

Marooshe

03/08/2008, 23:14

بعتبر قصائد طلال حيدر كتير مميزة...
يمكن لانو مكتوبة بالعامية ويمكن لانو بتخاطب كل واحد فينا بشكل مباشر،
بس اكتر شي بيجذبني الها
تأثيرها العميق يلي بلاقية عليي برغم انو مكتوبة بالعامية البسيطة وبرغم انو افكارها كتير واضحة
بس بتترك بصمات كتير قليل ما تتركها اشعار عامية...
يسلمو ميدو :D

sona78

01/07/2009, 18:40

حلو كتير كتير:gem::gem::gem:
متابعين معلم .. لنشوف شو لسا في عندك:D:D

وشم الجمال

04/07/2009, 12:44

طلال حيدر شاعر الكلمة,,,
شاعر ما كنت اعرفو او اقرالو بس جدا جدا مقام كتابتو رفيع

Nasserm

29/08/2009, 21:08

بلاد مقوصة

نمتي..

افتكروكي ولد غفيان..

تحت المي..

قربوا منك يحاكوكي..

لقيو بحيرة مي

وجّك متل رجعة ولد..

بعد الغياب

وجك.. متل تلة..

وعم تصرَخ دياب

يا عُمْر..

ما بيلحق يجي تيروح؟!

وجّك..

متل بيرق عزا..

من بعيد عم بيلوح

إنتي..

بيت أهلي

إنتي..

ورد عم إرفعُه..

ت سيّج الحقلي

إنتي بلاد مقوصَه..

وعم تنقتل قَبلي

إنتي..

وهبّط يا منام..

ووعّيا متلي

واقف على سهل البقاع..

ملتّم بشملة..

بصرّخ..

وصوتي ضايع..

وقالوا الهوا قِبلي

يا بيت أهلي..

يا سطيحات الحمام..

يا دعس عالي..

فوق تلجات المنام

.

من ديوان (آن الأوان)

فايق ورايق ومدايق

21/09/2009, 14:48

فقط طلال حيدر يستطيع أن يلون يومك العادي ويجعله كـ حفلة رقص....
فقط طلال يجعل فنجان القهوة أكثر لذة في الصباح....
تطفو صور من تحب ,,, تبتسم ,,, فنجان مغري ,,, ستصل إلى الهذيان....
هو وحده من يجعلك طاهراً كـ شيخ أثينا الزاهد....
هو طلال حيدر وطن الانتماء الحقيقي للحب للعشق للأحلام الجميلة....
فقط طلال حيدر يستطيع أن يسمعك ناي راع يبعد عنك آلاف الأميال,,,
فقط طلال يجعلك تستنشق صباحات السهول بعد زخة مطر نقي,,,
هو وحده من يغرقك في بحور الانسانية و يخرجك منه طاهرا تلعن عقلك,,,
هو طلال حيدر,,,, تلك القامة الشامخة, بعباءة تواضع و سمو.
حلو,,, مر,,, حامض,, مالح,,, دم,,, مي,,, زيزفون,,, بيلسان,,, عمامة,,, حصان,,, فارس,,, ضو,,, ليل,,,
دمشق ,,, بعلبك ,,, مصر,,, أفيون ,,, دمر ,,, لبنان ,,, بيروت,,, ملحمات طلال حيدر....
و الكاميرا عم تصور,,,,,و ما بيخلص الفيلم
سينما من سطور
هذا هو طلال حيدر فقط طلال حيدر

طلال حيدر ,,, لحرفك قبلة أعجاب....

أمرأة من ورق دمت بود