استفتاء أول السنة

[yass]

على اعتبار قربت السنة الجديدة ( ماني محشش, السنة الفارسية, تبعيت عيد النيروز يعني...) المهم, حابب هيك أوقع بين الناس شوي و بعمل استفتاء شعبية بالمنتدى وهيك يعني,فاضي أشغال وبدي اتسلى :P :P ....
حطيت هيك كام سؤال مشان اللي بدو يجاوب عليهون...شي خاص بالأقسام وشي بالأعضاء...وشي بالمشرفين...
1- شو رأيك بالأخوية بشكل عام؟
2ـ شو أكتر قسم بتحبو بالأخوية؟
3- قسم ما بتحبو أو حابب أنك تغير شي فيه
4- لو حابب أنو يصير قسم جديد بالأخوية, شو حيكون موضوع هالقسم؟

5- ظاهرة أو عادة بالأخوية تحبها
6- ظاهرة أو عادة بالأخوية تكرهها

7- عضو مميز بالنسبة لألك وليش ( اذا محتار بين تنين أو تلاتة حطون...مافي مشكلة)
8- عضو بتضحك معو كتير و بتتسلى بكتاباتو
9- رسالة اعجاب لعضو أو أكثر ( اعجاب بالمشاركات وكذا...مو تقلبوها غزل هلأ :lol: :lol: )
10- رسالة عتب لعضو أو أكثر..

11- شو رأيك بالمشرفين بشكل عام.
12- أي ملاحظة سلبية أو ايجابية بالنسبة لعمل المشرفين.

14- مساحة حرة ( اكتب شو ما بدك يعني...عكيفك)

تحياتي :D :D

[عاشق من فلسطين]

اقتراح رائع أبو مارل والواضح أنك تعبان عليه كتير الله يعطيك العافية ..
ورح بلش أنا ..
- شو رأيك بالأخوية بشكل عام؟
رائعة .. وصارت جزأ من حياتي بكل أعضاءها ومشرفيها وادارييها ومشاكلها وجدبتها وتحشيشاتها .. :hart: :hart:

2ـ شو أكتر قسم بتحبو بالأخوية؟
أنا صحي أكتر قسم بشارك فيه هوي الشعر بس أكتر قسمك بحبو وبستفيد منو كتير هوي (المنبر الحر) بفضل شخص عزيز ورائع بمواضيعو (أبومارل)

3- قسم ما بتحبو أو حابب أنك تغير شي فيه
هوي مو مابحبوا بس يعني بتمنى يكون الحوار فيه بشكل أقل حدية وهوي حوار الأديان ..

4- لو حابب أنو يصير قسم جديد بالأخوية, شو حيكون موضوع هالقسم؟
قسم خاص بعلم النفس ..تحديدا" ..

5- ظاهرة أو عادة بالأخوية تحبها
الأخوية ..

6- ظاهرة أو عادة بالأخوية تكرهها
الردود اللي بتكون بس وجوه وبيكون ممكن الواحد يعبر بغير الوجوه .. لأنو أحيانا" بيكون الرد بالوجوه بمحلو وكافي ومعبر ..

7- عضو مميز بالنسبة لألك وليش ( اذا محتار بين تنين أو تلاتة حطون...مافي مشكلة)
والله كل الشباب خير وبركة .. وما فيني حدد مو مشان شي لأنو فعلا" الكل مميز بشيء ..

8- عضو بتضحك معو كتير و بتتسلى بكتاباتو
كاكابودا والكينغ وفيليب وأم الزوز ..

9- رسالة اعجاب لعضو أو أكثر ( اعجاب بالمشاركات وكذا...مو تقلبوها غزل هلأ
لفراس لأني معجب بكتاباتو كتير بس هوي العاطل صاير بخيل وماعاد كتب ..

10- رسالة عتب لعضو أو أكثر..
لديموزي الغالي وبقل رجاع وحاجتك دلال بقى :hart: :hart:

11- شو رأيك بالمشرفين بشكل عام.
الشباب ما في منون بس لازم نكون حركين أكتر .. انطلاقا" مني وجر .. :P :P

12- أي ملاحظة سلبية أو ايجابية بالنسبة لعمل المشرفين.
لازم يكون في حركة أكتر ..

14- مساحة حرة ( اكتب شو ما بدك يعني...عكيفك)
موقع الأخوية هوي شيء أكبر من موقع انترنت أو مجرد تبادل مواضيع هو مجتمع رائع (بكل سلبياتو وايجابياتو) وأنا شخصيا" بالحياة الواقعية ما لقيت غير صديق واحد .. وبالأخوية رأيت ألف صديق .. الكينغ كاكابودا فيليب أبومارل ديموزي الاداريين كلهن (وهون بحب قلون أنو أحلى شي بالعالم الصفحة الجديدة ) وأم الزوز وحنونة وشوكوزلو وحسون وحنان وجوي .. وشو بدي أحكي لأحكي كل الشباب والصبايا رائعيين (وبالمناسبة ترتيب الأسماء اللي أنا كاتبها لايدل على أفضلية أحد على الآخر فالكل أخوة رائعين .. ولسا في كتير عالم ويمكن ماذرتها بس هنن بيعرفو معزتهون عندي ) يعني الصراحة انا من فترة كنت مفكر أترك الموقع بس ما قدرت لأنو عنجد صار جزأ من حياتي يعني اللخ يخلينا لبعض أخوات وأحباب وسوريين ..

وبالنهاية أحلى تحية لأبومارل ملك الأفكار الودية والابداعية .. :D :D :D

ولا تواخذنا ..
:hart: :hart: :hart: :hart:

[yass]

صار دوري ما هيك :lol: :lol: لنشوف

1- شو رأيك بالأخوية بشكل عام؟
الأخوية بالنسبة ألي وفرت فرصة حلوة كتير للتواصل مع البلد و أهل البلد...وحتى صارت بالنسبة ألي متنفس بعيد عن أعباء الدراسة و الحياة اليومية...مجتمع صغير اذا حبيتو
2ـ شو أكتر قسم بتحبو بالأخوية؟
المنبر الحر, بدون شك. قسم السفراء هلأ لساتو فطور التأسيس و التنظيم وكذا...بس كتير متفائل فيه و بتصور راح نستفيد كلنا منو
3- قسم ما بتحبو أو حابب أنك تغير شي فيه
بتمنى أنو حوار الأديان يصير فعلا حوار أديان...وكمان بتمنى يتنظم قسم قرأت لك بشكل أفضل
4- لو حابب أنو يصير قسم جديد بالأخوية, شو حيكون موضوع هالقسم؟
طموحي كان بقسم السفراء و تحقق...هلأ لسا ما خطر ببالي شي
5- ظاهرة أو عادة بالأخوية تحبها
لغة الحوار و التعامل كتير حلوة و خفيفة...حتى بأكثر المواضيع تعقيدا و جدية بتلاقي أريحية
6- ظاهرة أو عادة بالأخوية تكرهها
أحيانا بنخلط كتير المزح بالجد و نكتر سلامات و تحيات و شوباشات بدون طعمة...لازم ننتبه على هالشي شوي
7- عضو مميز بالنسبة لألك وليش ( اذا محتار بين تنين أو تلاتة حطون...مافي مشكلة)
العاشق من فلسطين...شريكي, شو بدي أحكي لأحكي
حشت نشت , يا شيخ بتمنى بيوم من الأيام أقدر أوصل لفلسفتو و طريقة تعبيرو, رائع فعلا
الأستاذ, كتير بختلف معو بالرأي أحيانا, بس دائما بيسكتني بموضوعيتو و طريقة تعبيرو الهادية
8- عضو بتضحك معو كتير و بتتسلى بكتاباتو
فيليب...يازلمة كتير بيعجبني مرحو
9- رسالة اعجاب لعضو أو أكثر ( اعجاب بالمشاركات وكذا...مو تقلبوها غزل هلأ )
جيني....منبع مشاعر فعلا
نانا...وينك يا شريكة, والله اشتقنالك
ديموزي, بدك فركة اذن
10- رسالة عتب لعضو أو أكثر..
حسون, حاج ماسكها حنبلية يازلمة, روق, احكي شو مابدك, بس اسمع حكي غيرك

11- شو رأيك بالمشرفين بشكل عام.
على سلامتهون و الله...كتير عم بنتعاون, وعم بيسمعو أقتراحاتي (هون بيجي سلام خاص ناص للحكيم)
12- أي ملاحظة سلبية أو ايجابية بالنسبة لعمل المشرفين.
بدنا مشرف لقرأت لك...

14- مساحة حرة ( اكتب شو ما بدك يعني...عكيفك)
أنا حطيت الأسئلة...بس عن جد ما كفوني لاعبر عن شعوري تجاه المنتدى...هالأشهراللي صارلي هون فعلا كانت كتير حلوة, و الخير لقدام انشالله...
بتمنى الغايبين يرجعو, خصوصي جدا ديموزي, فراغو جدا كبير...وسلام خاص لأبو زياد
الأسامي اللي ذكرتها بيجوز لأنو أكتر شي ألي علاقة معهون...بس ما بدي انسى ذكر حدا...جو , الكينغ رورو , سعيد , أركيتيكتورر, جينو ,فؤاد, كاكابودا...استمرو ها...
بدي أرحب بالأعضاء الجدد اللي شرفونا بالفترة الأخيرة...أهلا وسهلا فيكون


ليش حاسس حالي ربحان شي أوسكار :confo: :confo:

[عاشق من فلسطين]

ليش حاسس حالي ربحان شي أوسكار

لأنك بتستاهل أوسكار على هالفكرة الرائعة ..
وتحياتي شريك .. :gem: :gem:

[hanone]

أول الشي الفكرة كتير حلوة
1-أنا كتير مبسوطة با للأخوية وهون الواحد بيحكي على كيفوا
2-بحب الساحة الفنية كتير والرياضة
3-حوار الديان لانوا كتير في ردود ما حبيتا
4-بدي قسم لالي ولوائل :lol: :lol:
5-العفوية والطبيعية بالردود
6-اكتر الشي وقت بيحولوا المواضيع لسيرة الحشيشة يعني رح يعملوني محششي
7-كلونمهضومين بس اكتر الشي مجد والكينغهدول بشوفون على طول وكمان كابودا والعاشق وأم الزوز كتير لذيذي
8-ام الزوز
9-أنا معجبة بالكل
10-ما بعتب على حدا كلون بحبون
11-أنا كتير بحبون
12-مافي على سلامة كلون بس هدا كينغ عم يعذبني خلي يبعد عن وائل
13-عنجد الاخوية كتير حلوة انا سعيدة كتير اني كون من احد اعضاء وشكرا كتير على الفكرة بتعقد

[dimozi]

مرحبا
:D

1- شو رأيك بالأخوية بشكل عام؟
الاخوية ,موقعي بكل بساطة , بتسألوني رأيي بالاخوية , متل رايي بحمص , احلى شي , و احسن من هيك بتنتزع .
2ـ شو أكتر قسم بتحبو بالأخوية؟
بحب الشعر و الخواطر , و بحب اكتب بالمنبر الحر بس ما بصراحة مابسترجي :cry: يعني في كتير مواضيع بكون حابب اكتب فيها و بتحرقص بجي بدي اكتب و انا عم لف و دور , بعدين بحذف اللي كتبتوا و بمشي :roll:
3- قسم ما بتحبو أو حابب أنك تغير شي فيه
كل المنتديات الروحية بحسها بلا طعمة , البسطة كمان , وزنوا شوي يا جماعة .......... شو بسطة ما بسطة ......... بربكن حدا باع او اشترى فيها شي :?: :?
4- لو حابب أنو يصير قسم جديد بالأخوية, شو حيكون موضوع هالقسم؟
عجبني اقتراح عاشق بمنتدى لعلم النفس , و بتصور انو الاخوية بتحتاج لقسم للتوعية الاجتماعية و الجنسية , بتصور المواضيع مترابطة مع بعضها, و لو كان في محاذير او تخوفات , الموضوع بينحل بالاشراف يعني بس كان في اكتر من مشرف واعي على القسم ما بتصور يكون في مشاكل , كام دكتور على كام متخصص :P بتصور القسم رح يكون حيوي و مفيد .
5- ظاهرة أو عادة بالأخوية تحبها
البراءة اللي بالاخوية حلوة كتير .................. ما في روح الشر اللي بغير مواقع .... و الناس بتحب بعضها هون ................ ما كل الناس بس ماشي الحال :shock:
6- ظاهرة أو عادة بالأخوية تكرهها
المجاملات يا أخي ............ و الله مشكلة ............ من زمان و انا بقول المجاملات كترانة ......... تمسيح الجوخ بيكون على ابو موزة أيام ................ و غياب النقد ........... كلو بالاخوية حلو ...... وما حدا بيغلط ................ معقولي :?: يا اخي شوية نقد ما بيضروا حدا ولا بيمغصوا حدا , كمان اذا الواحد حكا اي شي على ............. الحكومة ............... ما بيسلم يعني :cry: :lol:

7- عضو مميز بالنسبة لألك وليش ( اذا محتار بين تنين أو تلاتة حطون...مافي مشكلة)
هلاء اذا بدي عد ما رح خلص ............. الغوالي كتار و بيعرفوا حالن منيح و ما بتصور في حاجة قول اسماء :shock:
8- عضو بتضحك معو كتير و بتتسلى بكتاباتو
حشت نشت ............... عاشق على الخط بيفقع ضحك ........... و بحب مواضيع التحشيش كتير و بتعز على قلبي ............ نانا مغرقة بالسخرية المضحكة و الموجعة بنفس الوقت , يعني بتعرف وين تضرب و تصيب
9- رسالة اعجاب لعضو أو أكثر ( اعجاب بالمشاركات وكذا...مو تقلبوها غزل هلأ )
آسف Yass بدي أقلبها غزل بـــ Geeny حياتي أشتقتلك كتير ............. وينك :hart:
10- رسالة عتب لعضو أو أكثر..
الله لا يجيب عتب ............... هلاء لا يخلو الامر يعني انو في كام واحد بدهن فركة ادن :angel: ............ صدقت حالي........ لا جد في كام واحد بدهن فركة ادن ............. مين ؟؟؟؟ أنا ؟؟؟؟ليش يا اخي؟؟؟؟؟ :P

11- شو رأيك بالمشرفين بشكل عام. :? :shock: :roll: :dr: :confo: :confo: :frown: :P :oops: :cry: :mrgreen: :hart:
12- أي ملاحظة سلبية أو ايجابية بالنسبة لعمل المشرفين.
يعني في ملاحظات ............... بس بخاف اذا حكيت شي تاني يوم شوف الموضوع منقول على الارشيف أو محطوط بالمنصة :lol: ............. لك مزح مزح :mrgreen:


14- مساحة حرة ( اكتب شو ما بدك يعني...عكيفك)
الاخوية متغيرة ............. بنواحي نحو الاحسن ..................... و بنواحي نحو :roll: الاحسن , شو بدنا نحكي , المهم كلو منيح , و على قولت حشت الستة احسن شي و مدري شو قصة السبعة :P اذا بدي وجه تحيات ما بعرف لمين ولا لمين ............... لان جد ما بوفيهن حقن ............. الكل هون رفقاتي .........شايف انو في جداد كتير بتمنى انو نتعرف على بعض و نصير صحاب............... اي تذكرت

احلى تحية لأحلى حسون لانو عجبتني صراحتوا و عفويتوا و اندفاعوا المجنون :D ............. و بتمنى ما حدا يقمعوا متل ما كان عم يصير
:angel: :angel:





تحياتي الخضراء :mrgreen:

[zozo]

اول شي بدي اشكر عاشق كتير
بعدين اخي يس مشكور على الفكرة الحلوة
انا بالنسبة الي كل الاقسام حبيتن بس بلشت اهتم بجزء من قسم اكتر شي وهو المطبخ يعني كانت فكرة كتير حلوة وانا ايدتا من الاول

اكتر اشخاص بنبسط معن عاشق / فيليب / كاكابودا / اخيل / atramez zeton / زين / حنان / زنوو / شكوزولو / وكتار غيرن



طلب من المشرفين : تحركو شوي يا كسلانين



الله يعطيكن العافية جميعا :D :D :D :D

[Kakabouda]

شو رأيك بالأخوية بشكل عام؟

محليها أعضائها

شو أكتر قسم بتحبو بالأخوية؟

ما بدها 2 يحكوا فيها أكيد الخواطر و الخربشات هههه

3- قسم ما بتحبو أو حابب أنك تغير شي فيه

حوار الأديان ... جاي على بالي سميه ساحة الصراع في الأديان

لو حابب أنو يصير قسم جديد بالأخوية, شو حيكون موضوع هالقسم؟

فعلياً كتير أشياء بس أكتر شي قسم خاص بالصيد بكل أنواعي لأني بموت بشي اسمو صيد ..

- ظاهرة أو عادة بالأخوية تحبها

في أحلا من ظاهرة الحريمات عنّا صبايا هون بجد بشهوا الحيات بوجهلهم أحلا تحية

ظاهرة أو عادة بالأخوية تكرهها

بلا فضايح خلينا ساكتين :P

عضو مميز بالنسبة لألك وليش

كل الصبايا يؤبروا ألبي
والشباب جميعاً بس يعني برأس القائمة العاشق و كينج رورو و هشت نشت و ديموزي و الحلاق و شوكوزولو و و و و يعني الكل الله يديمنا لبعض

عضو بتضحك معو كتير و بتتسلى بكتاباتو

عاشق دخيل ربو .. أم الزوز العظيمي .. أبو نهلا لعظيم و كمان بدون استثناءات ..

رسالة اعجاب لعضو أو أكثر

أم الزوز أحلا روح فعلاً ..
حنوني أحلا تعاليق ..
عاشق ملك التعاليق
الكينج بظن الاسم كافي للتعبير
هشت نشت اللي عطاني شرف الهشت نشت بمقولتو الشهيرة only kakabouda can hasht nasht
زنو عبير أنجل و كل الصبايا حبيبات ألبي
خلص خلص فهمنا الكل تحياتي هههه :D

رسالة عتب لعضو أو أكثر..

للحكيم بدنا نشوفك اشتقنالك يا زلمي خلص عاد مل من مصر ...

شو رأيك بالمشرفين بشكل عام

شي رفع والله ههههه يعني كريم شنتيه المنتدا .. زبدة المنتدا :lol: :lol:
أي ملاحظة سلبية أو ايجابية بالنسبة لعمل المشرفين

أوجه حديسي للمشرف كاكابودا و بقلو يعطيك العافية :lol: :lol:

مساحة حرة ( اكتب شو ما بدك يعني...عكيفك)

الله يديم المحبة و الأخوة بهالمنتدا ...
تقبلوا فائق احترامي .. كاكابودا :D

[Kakabouda]

اكتر اشخاص بنبسط معن عاشق / فيليب / كاكابودا / اخيل / atramez zeton / زين / حنان / زنوو / شكوزولو / وكتار غيرن

صدقي يا أم الزوز والله شعور متبادل :D

[عاشق من فلسطين]

مشكور كتير يا أبو جريج .. لك والله لأطلع على حمص وافرشها ورد لأجلك ..
:D :D وأم الزوز الغالية شو بدي أحكي لأحكي .. آخ .. :D :D

[HashtNasht]

- شو رأيك بالأخوية بشكل عام؟


لا باس ....يعن ماشي الحال....مقبول...منقول منيح...نشكر الله ..ما شاء الله ...شي فخامة ....احسن من هيك يعني ما بصير....يا ويلاه احلى موقع بالعالم :P


2ـ شو أكتر قسم بتحبو بالأخوية؟

الصالون...أنا من زمان ..من وقت ما كنت صغير كنت حب الصالونات ..بس كنت لفضل لو كان في قسم اسمو البلكون..لأنو بالصيفية بصير شوية شوب....ولا ما بصير شوب :?


3- قسم ما بتحبو أو حابب أنك تغير شي فيه

حوار الروح....يعني لهلق انا ما فهمت انو شو بينحكى بهاد القسم .؟؟؟ انو يعني روح ولا تطول مثلاً ؟ ولا روح القلب داعيلك ( مع تحياتنا للكينغ ) :D


- لو حابب أنو يصير قسم جديد بالأخوية, شو حيكون موضوع هالقسم؟


قسم الأعضاء المفقودين...يعني اسمو عم يكترو الاعضاء اللي عم يختفو فجأة ..أنا رأيي نخصص قسم منحكي في عن تاريخ هالاعضاء..و منحط في ابرز مشاركاتن ..و لمحة عن تاريخن ..و منحتفل بالذكرى السنوية لرخيلن ..و هيك يعني...مشان التواصل بين الأجيال :lol:


5- ظاهرة أو عادة بالأخوية تحبها


ظاهرة اختفاء الأعضاء...لأنو شي سيسبنس العادة ..يعني و في اكشن :P


6- ظاهرة أو عادة بالأخوية تكرهها


تمسيح الجوخ....و ما حدا يرد عليي رجاءً ..أخي خدوني ع قد عقلي :frown:


7- عضو مميز بالنسبة لألك وليش ( اذا محتار بين تنين أو تلاتة حطون...مافي مشكلة)


يعني ..هو في أعضاااااااااااااااااااااء مميزين ..كل واحد مميز بتميز مختلف عن تميز التاني ...و ما بدي سمي حدا مشان ما حدا يفكر اني نسيت حدا لأني ماني نسيان منوب...هني المميزين بيعرفو حالن و بيعرفو حالن ليش مميزين ..و هاد الشي اللي بميزن اساسً ...فهمت عليي منوب ؟ :angel:


8- عضو بتضحك معو كتير و بتتسلى بكتاباتو


يعني بشكل عام حلف الأحششي ...شي سيلما ع الاخر...و في ( الرفيق ) حسون ..كمان سيلما ...بس صاير شوي ع سينس فيكشن . :P


- رسالة اعجاب لعضو أو أكثر ( اعجاب بالمشاركات وكذا...مو تقلبوها غزل هلأ )

بوجه رسالة إعجاب للعضو حشت نشت ...بحسو انو انسان كبير..و بيفهمني تمام ..يعني أحياناً بس انو عم يحكي شوفي براسي...ما طبيعي هالزلمي i love you Hashtooooooooooo :lol:


10- رسالة عتب لعضو أو أكثر..

و الله انا عتبان ع الادارة...و كتير يعني ...و ما بدنا نرجع نفتح مناحة هلق ..أخي عتبان و خلص :pos:


11- شو رأيك بالمشرفين بشكل عام.


مع أنو ما بحب أحكي بالسياسة ..بس بشكل عام ماشي .....ماشي الحال ...يعني دورة اشرافية و بتمضى ... :lol: :lol:
عم امزح ...و الله كلكن ع راسي :D


12- أي ملاحظة سلبية أو ايجابية بالنسبة لعمل المشرفين.

14- مساحة حرة ( اكتب شو ما بدك يعني...عكيفك)


هدول التنتين ...يعني ما بقدر احكي...اول شي لأنو ما بحب اعطي ملاحظات ...و ما بعرف اذا لاحظتو هالشي يعني...و تاني شي لأنو ما بدي مشاحة حرة

بدي مساحة مانها حرة منوب..بدي عبر من خلالها لأبو مارال ..عن عميق الشكر و الامتنان لما يتخذه من مواقف نضالية ..تتجسد فيما نحن فيه الآن ...و أحلا ابو مارال و احلا 1984 :D :D :D

[zozo]

اخي كاكابودا انا بدي اشكرك من كل قلبي وبتمنى اضل اخد عني فكرة منيحة وصح
اخي عاشق بدي اشكرك كتير على كلشي ولانك ساعدتني بكتير اشيا بالموقع
يعني انا بشكل الله لانو عرفني عليكن وعلى كل الشباب والصبايا المناح يلي بالموقع والله يقويكن جميعا :oops: :oops:

[عاشق من فلسطين]

والله أنت كبيرة وما في منك يا أم الزوز .. :D :D

[Kakabouda]

اخي كاكابودا انا بدي اشكرك من كل قلبي وبتمنى اضل اخد عني فكرة منيحة وصح

أحلا أم الزوز بالعالم العربي و الهنجاري والبورتغالي .. يا غالية
1000*1000 :D

[zozo]

أحلا أم الزوز بالعالم العربي و الهنجاري والبورتغالي .. يا غالية
1000*1000

مشكور يا غالي من كل قلبي :sosweet: :sosweet: :sosweet:

[znno]

1- شو رأيك بالأخوية بشكل عام؟

احلى موقع بالعالم


2ـ شو أكتر قسم بتحبو بالأخوية؟

يعني هوي كل الاقسام حلوة بس اكتر شي بحب ع الطاير


3- قسم ما بتحبو أو حابب أنك تغير شي فيه

حوار الاديان ......الردود كتيير حادة ...يعني بنقول تيس بيقولو حلبوه


4- لو حابب أنو يصير قسم جديد بالأخوية, شو حيكون موضوع هالقسم؟

حاليا مافي شي محدد


ظاهرة أو عادة بالأخوية تحبها

المحبة و المزح و الاخوية


6- ظاهرة أو عادة بالأخوية تكرهها

الردود الحادة احيانا


7- عضو مميز بالنسبة لألك وليش ( اذا محتار بين تنين أو تلاتة حطون...مافي مشكلة)

كل الاعضاء خير و بركة بس اكتر شي مميز الكينغ ابو الرور و فيليب (مساعدي الخاص) و حنوني و زوزو


8- عضو بتضحك معو كتير و بتتسلى بكتاباتو

عاشق من فلسطين و كاكابودا و ابو الرور و فيليب و قطرميز زيتون و زوزو (بعتذر اذا نسيت حدا)


9- رسالة اعجاب لعضو أو أكثر ( اعجاب بالمشاركات وكذا...مو تقلبوها غزل هلأ

كل الصبابا و الشباب خير و بركة من دون استثناء


10- رسالة عتب لعضو أو أكثر..

ابو الرور وينك ........صرلنا زمان ماشفناك بالمنتدى


11- شو رأيك بالمشرفين بشكل عام

بياخدوا العقل :D


12- أي ملاحظة سلبية أو ايجابية بالنسبة لعمل المشرفين

شباب شدوا الهمة بدنا حركة اكتر من هيك


14- مساحة حرة ( اكتب شو ما بدك يعني...عكيفك)

الله يعطيكن العافية يا شباب
عنجد موقع روعة (بما تحمله هذه الكلمة من معنى)

[Hus]

1- شو رأيك بالأخوية بشكل عام؟

موقع حلو .. او بيجوز حلو كتيييييير ومنيح كتير .. بس بالناس الي فيه ..

2ـ شو أكتر قسم بتحبو بالأخوية؟

كل الأقسام متل بناتي .. ما بقدر ميزة وحدة عن التانية :shock: :lol:

3- قسم ما بتحبو أو حابب أنك تغير شي فيه

الصالون .. جاي عبالي لو بيكون صالون للإستقبال الضيوف المهمين وطق الحنك معون .. مو يصير سقيفة نرمي البضاعة العتيقة فيها .. :P

4- لو حابب أنو يصير قسم جديد بالأخوية, شو حيكون موضوع هالقسم؟

بحب لو بيكون في قسم جديد انسميه حوار الخرسان الطرشان .. واتكون كل المواضيع الي فيه فاضية (بدون ولا كلمة بس ابتسامات) لانو ما عم انلحق نقرأ وانتابع الأقسام الموجودة .. بقا حبزا اذا بدو يكون في قسم جديد يكون صااااااااامت ..

5- ظاهرة أو عادة بالأخوية تحبها

بحب بالأخوية انها ليست نقرات كي بورد على صفحات انترنت .. (كمعظم المواقع ) وانما تتعدى النقرات على الصفحات لترنو للنقرات على الإفئدة والوجدانات (جمع وجدان ..قال على اساس.) :lol:

6- ظاهرة أو عادة بالأخوية تكرهها

بكره باخوية انها مستحيل تفضل كما هي ... وانو دائما بتتغير .. (والتغيير بيحمل دائما ايجابيات وسلبيات.. لانو متل ما بتعرفو الوحيد الي ما بيغلط هوي الإنسان الي ما بيعمل شي.. والي ما منشوفهم بيغلطو مو لانو معصومين .. لاء لانو هني اصلا واساسا ما عم يعملو شي .. المهم .. باخوية بكره انو بدها تتغير شئنا ام ابينا (هذا قانون الكون وسنتو).. وبإمل التغيرات تحمل معها رجحان لكفة الإيجابيات على السلبيات ..

7- عضو مميز بالنسبة لألك وليش ( اذا محتار بين تنين أو تلاتة حطون...مافي مشكلة)

اكتر عضو مميز بالنسبة لي "سوسو الأمورة" -مديرة العلاقات العامة باخوية.. ونائبها فصحون الناطق الرسمي بإسم مكتب سوسو الأمورة .. غيرون معجب ب Mr POLICE الي المفروض قال عامل فيها امن المنتدى .. و Akhawia الي مستحملني كل هال السنيني و مسيوGodAdmin الي عم بيساعدنا بأمور كتييير..

8- عضو بتضحك معو كتير و بتتسلى بكتاباتو

كل الأعضاء الجدد الي عم يتفشكلو باخوية بالغلط وعم بيشاركو وخاصة هدول الشلة جماعة القبائل الي عم بيدرو على زويهم واقاربهم بالشام هههههههههههههههههه اي هدول بيفطسوني ضحك ..

9- رسالة اعجاب لعضو أو أكثر ( اعجاب بالمشاركات وكذا...مو تقلبوها غزل هلأ )

انا معجب بكل المبدعين .. بكل المجالات .. يعني اي شخص بيبتدع اي شي انشاء الله شحاطة بيعجبني .. لاء اكتر .. الحقيقة انا من النوع الي بيفتح تمو امام الإبداع هيك :o
فما بالك بالناس الي بتبتدع موضوع ولا قصة ولا شعر ولا حوار جيد ولا فكرة ولا مشروع ولا قرار ولا نكتة ولا صورة ولا شرح ولا ولا ولا ..
كل شيئ بالدنيا بيقدر الواحد يتعلمو .. من الطب للهندسة للسياسة للصناعة الشعر للتمثيل للرسم للكلام للرقص للحنجلة .. كلو بينفع تتعلمو بس ما بينفع تتعلم الإبداع هذا شيئ ما فيك تتعلمو ولا اتعلمو .. بيجي مختوم بالواحد
غير ان في ناس بيكون مختوم معها الإبداع بس ما بتحس .. بقا حبزا كل واحد يحسس على جنابو ويشوف في شي ابداع مختوم معو ؟؟
:lol: :lol: :lol:

10- رسالة عتب لعضو أو أكثر..

اي انا عتبان على كتير ناس.. بس بالمنتدى ما عتبان على حدى .. (فما حدى بينعتب عليــــــــــــــــــه) ههههههههههههههههههههههههه
لاء القصد تم فهمو غلط .. انا قصدي يعني عتبان على ناس ما عم تدخل بس مقدر ظروفهم بالتالي راح العتب ..
وعتبان على ناس ما عم ينكشو .. بس كمان انا مقدر ظروفهم فراح العتب..
وعتبان على ناس زعلانين وما عم يحكو .. وعلى اعتبار اني مقدر ظروفهم واسباب الي بتدفعهم للصمت فكمان راح العتب ..
وعتبان على ناس ما بتسكت .. بس كمان انا مقدر ظروفهم ودوافعهم .. فكمان راح العتب ..
يعني بالأخير اكتشفت اني ما عتبان على حدى ..


11- شو رأيك بالمشرفين بشكل عام.

هلق السؤوال انو شو رايك بشكل عام .. اي بشكل عام طبعا مناح .. يعني من غير المنطقي يكون في مشرفين ما مناح .. (زعران مثلا ههههههههههههههههههه) مو هون وبس بأي مندى بالأرض لازم يكونو مناح .. فكل المنتديات في الأرض معفية من الضرائب والفساد الإداري .. وهذا سبب وجيه لوجود مشرفين مناح بكل المنتديات ..
بس عاد لو كان السوال شو رأيك بالمشرفين بشكل خاص .. بقلك
انو مناح..
اي مناح .. بس مو دائما الرجل المناسب بالمكان المناسب .. لانو الواحد بيجي على الدنيا لحالو .. لازم هيك لو بيجي الواحد ومعو خريطة الكترونية لمخو مثلا .. اي وقتها بيصير اسهل يكون الشخص المناسب بالمكان المناسب على ضوء الخريطة الإلكترونية لمخو ..
هاهاهاها


12- أي ملاحظة سلبية أو ايجابية بالنسبة لعمل المشرفين.

اي ايجابية عندي.. بحب قلهم يعطيكم العافية ... جدا .. فالجهد الي عم تعملوه جبار بكل الأقسام سواء الي انتو فيها او الي لاء ..

14- مساحة حرة ( اكتب شو ما بدك يعني...عكيفك)

اخيرا بحب استهل المساحة الحرة منشان وجه تحية او مثلا اخلع قبعتي.. لكل الي ممكن نجدل على تسميتهم معارضة بالمنتدى .. او مثلا التيار الأخر .. لانو لولاهم ما بتتحسن الأخوية بالقدر المطلوب .. فدائما الي واقف على السطح بيشوف الشارع احسن من الي قاعد جوات سيارة جوات الشارع .. (منشان هيك بتلاقي تبعوت الي بيرصدو الطرقات والزحمة المرورية برا .. بيحلقو بطيارات فوق الشوارع منشان يشوفوها احسن ويساعدو الي بالشارع على انو يمشو بالطريق الأقصر والي مافيه زحمة وهيك .. )
وعلى اعتبار ما بيقدر الواحد يكون بسيارة بالشارع وبنفس الوقت بطيارة فوق الشارع .. فوجب شكر الي بالطيارات لمساعدتهم الي بالسيارات .. :D :D :D

وعلى عيني ابو الزلف

[SABE]

شو رأيك بالأخوية بشكل عام؟

الله الوكيل رائعة و أكتر من رائعة .. يعني حلوي ..
متل ما قلت و بقول دائماً .. أخوية هي بيتي على شبكة الإنترنت .. .

شو أكتر قسم بتحبو بالأخوية؟

أكتر قسم هو ////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////
و باقي الأقسام كلون حلوين ..
بس بشكل عام أكتر شي بحب الخواطر و الخربشات ...

3- قسم ما بتحبو أو حابب أنك تغير شي فيه

قسم حوار الأديان .. لأنو بيوجعلي راسي ... ببساطة

لو حابب أنو يصير قسم جديد بالأخوية, شو حيكون موضوع هالقسم؟

حلو يكون في قسم إسمو منقول .. و ضمن هالقسم إذا حدا قرا شي خاطرة حلوي أو قصة قصير حلوي أو تفركش بشي شغلة بغير مواقع و حابب ينزلها هون .. بقا بيكون ما في مشكلة .. يعني منطقة مشان ممارسة هواية الكوبي- بيست

- ظاهرة أو عادة بالأخوية تحبها

إنو موقع ما بينشبع منو ... و إنو أععضاء هالموقع هني أطيب و أحلى شعب بالعالم ..
طبعاً مو الكل ... لأنو في عالم أطيب من أطيب شعب و أحلى من أحلى شعب بالعالم .. :P

ظاهرة أو عادة بالأخوية تكرهها

أوقاتاً شغلة التحشيش كتير حلوي و أوقات كتير بتذيد شوي عن حدها ..
و كمان لازم يكون في تعليقات جدية أكتر و خصوصي بالمنتديات الأدبية .. يعني بمعنى آخر بدنا نشوف ناقدين عنجد .. شو في أخطاء بالقصيدة أو الخاطرة . شو فيها أفكار حلوة .. و ذا شي قصة قيرة .. كمان النقد البناء كتير بيفيد ..
و إنشالله نكون أكتر من بس قارئين حياديين ..
بتمنا تكون وصلت الفكرة :)

عضو مميز بالنسبة لألك وليش

الجينيرال سمايلي أبو وردة :cry: و بدي قلو إنو إشتقتلك كتير .. و إشتقت لمغامرات إمبراطورية حمص المستقلة ..
بس حابب قول بهالمناسبة شغلة ...
ثورة على الطغيان ..... لعب و بيرة و نسوان :lol:
و الأعضاء المميزين على قولة ديموزي .. بيعرفو حالون ... إي .. انت .. ليش مفكر إنو مانك مميز ؟؟؟

عضو بتضحك معو كتير و بتتسلى بكتاباتو

ما بدي سمي مشان ما كون نسيت حدا : حشت نشت (( السبعة أحسن من الستة .. و الستة أحسن شي )) و بدي قلو لحشت نشت أنا عنجد معجب بنظرياتك و بكتاباتك كلها .. حتى و لو كان تعبق بسيط .. و حتى ولو كان بس وجه ضاحك بس يكون جنبو إسم حشت نشت بيكون غير شكل ... ولا شو ؟؟؟

رسالة اعجاب لعضو أو أكثر

أول شي الله يعطي الكل العافي ... لأنو لولا هالأعضاء المميزين ما بيكون صار موقع أخوية مميز ... و لولا الإدارة كمان ..
المشرفين كلون بيجننو .. (( و خصوصي هاد تبع الصالون .. سمعت إنو رهيييييب )) و عميعملو يلي عليهون و زيادة ..
الأعضاء رهيبين .. القدماء و الجداد كمان ...
القدماء لأنون هني أساس هالموقع ... و الجداد يلي عميحاولو يفهمو مسيرة الموقع و أهدافو وتطلعاتو ... و عميسيروا فيه دائماً نحو المقدمة ..
و كمان فوق هاد بحب وجهة وردة وردة لكل من الثلاثي يلي كتير نحسهون مميزين ديموزي , حشت نشت , نانا ....
و ميت وردة لأحلى شباب و صبايا :
جو : بتعجبني أفكارك و طريقتك بالرد و التعامل مع الموضيع .
كينغ رور : روح القلب داعيلك , انت و فيليب و عاشق من فلسطين و كاكابودا و الحلاق عاطين نكهة كتير حلوي للموقع ..
ياس : برفعلك القبعة (( على قولة ديموزي )) على هدوئك بالتعامل مع الشغلات الصعبة ..
و أكيد مسك الختام للشخص يلي عنجد عميتعب أكتر واحد بالموقع .. و يلي الكل هون مقدرين تعبو معنا .. و لو شو ما عملو الأعضاء ما رح نقدر نكافيه .. بتقد الكل عرف مين هالشخص هاد ...
أكيد الحكيم حسام :D :D و عنجد حكيم .. الف شكر و ميت وردة على كلشي ... (( هون بنسمع صوت تصفيق حار ))

رسالة عتب لعضو أو أكثر..

أكتر شي عتبان على نانا يلي صرلنا زماااااان ماعاد شفناها معنا .. و عنجد إشتقنالك و إشتقنا لمفاجأاتك الحلوي ..
و كمان ديموزي يلي متقل حالو هالفترة علينا و ما عمنشوفو غير بالأعياد ..
و رسالة عتب على ياس : ليش ما نزلت هالموضوع من زمااااان :P

شو رأيك بالمشرفين بشكل عام

شهادتي بالمشرفين مجروحة ... بس الله يخليهون ... وويفقون .. و يسعدون و بس ...

أي ملاحظة سلبية أو ايجابية بالنسبة لعمل المشرفين

لا ما عندي ملاحظات بالوقت الحالي.. بس يصير عندي بحكي لا تخافو عليي ما بستحي من حدا .. وما عندي يا أمي ارحميني ...

مساحة حرة ( اكتب شو ما بدك يعني...عكيفك)

بس بدي قول إنو عنجد الواحد ما بيعرف بقيمة لشي لحتى يفقدو ..
من فترة ما كتير طويلة إنقطع خط الإنترنت عندي و كان عندي وقتها كمان فحوص .. يعني ما إقدرت إدخل على الموقع بولا شكل من الأشكال .. وقتها حسيت بقيمة الموقع ..
و في شغلة كمان , و بصراحة أنا نفسي مستغربها .. هي إنو أول ما بسمع وائل كفوري و خصوصي الألبوم الجديد ما بيخطر على بالي غير أخوية .. (( و عسيرة وائل أحلا ميت وردة لأم وائل .. عنجد إشقتلك هنوني الغالية ))
و لا تأخذوني طولت عليكون ..
سلامات ..

[hanone]

لك على راسي أبو السعود أنا كتير مشتائتلك من زمان ما حكينا سوا نشالله شوفك قريبا ونشلي كتير دير بالك على حالك :D :D :D :D :D

[جينو]

1- شو رأيك بالأخوية بشكل عام؟

كتير حلو و صار عندي واجب يومي يعني كل ما إفتح الكومبيوتر أول شغلة بعملها أدخل عالموقع و شوف شو في جديد

2ـ شو أكتر قسم بتحبو بالأخوية؟

كلون بحبون بس اهضم شي عالطاير ، و أكيد المنبر الحر اللي بحب إقرا مواضيعو على طول

3- قسم ما بتحبو أو حابب أنك تغير شي فيه

حوار الأديان

4- لو حابب أنو يصير قسم جديد بالأخوية, شو حيكون موضوع هالقسم؟

و الله الحقيقة ما في معين ببالي هلق... إذا فكرت بشي ببقا بخبركون

5- ظاهرة أو عادة بالأخوية تحبها

بحس حالي بلحظة نسيت الغرية و رجعت على سوريا و على حمص بالذات

6- ظاهرة أو عادة بالأخوية تكرهها

بصراحة بصراحة ... كتر السلامات و شكراً إلك و على راسي ما بعرف شو ... أكتر الأحيان بيكونو ما إلهون لزوم و بيقللو من قيمة الموضوع اللي بينقلب لشلة شباب قاعدين بالقهوة و حول خيو خلينا نضيفك كاسة شاي ...

7- عضو مميز بالنسبة لألك وليش ( اذا محتار بين تنين أو تلاتة حطون...مافي مشكلة)

يعني شريك كتير صعبت علينا بهالسؤال ... يعني في مجموعة ماكنة مميزة بالنسبة إلي... إنت على رأس القائمة.. كينغ رورو، فيليب، عبورة، ارتشيتكتير، حشت نشت، جو، كيكو ،سعيد..... كمل كمان و لا حاجة؟؟؟؟

8- عضو بتضحك معو كتير و بتتسلى بكتاباتو

حشت نشت كتير مهضوم و تعليقاتو رهيبة
9- رسالة اعجاب لعضو أو أكثر ( اعجاب بالمشاركات وكذا...مو تقلبوها غزل هلأ

تحياتي لإلك شريك

10- رسالة عتب لعضو أو أكثر..

ديموزي؟؟؟؟؟ يا بخيل

فارس كمان شكلك عم تنعدى من ديموزي بالبخل و ما عاد عم نشوف كتاباتك متل الأول

11- شو رأيك بالمشرفين بشكل عام.

شغلة... خصوصي في سنيورة مشرفة مو متذكرة إسمها هلق ..... لاء خلينا نحكي جد عم بيحاولو قد ما فيهون لحتى يحافظوا على مستوى المنتدى و يطوروه يعطيكون العافية

12- أي ملاحظة سلبية أو ايجابية بالنسبة لعمل المشرفين.

لازمنا شوية تنسيق أكتر من هيك.... و حياتكون شوي صغيرة بيمشي الحال

14- مساحة حرة ( اكتب شو ما بدك يعني...عكيفك)

من قلبي بشكر كل الشباب و الصبايا الموجودين بالمنتدى على الجو الحلو اللي خلوني إرجع عيشو لأنو عن جد كنت فاقدتلو و الشباب اللي بالغربة يمكن كلون بيعرفو عن شو عم إحكي ....

[nana]

1- شو رأيك بالأخوية بشكل عام؟

بحسو موقع مميز كتير باعضائو و معظم مواضيعو



2ـ شو أكتر قسم بتحبو بالأخوية؟

انا كنت حب الصالون (بس هو قلي صعب :pos: ) و المنبر الحر بقا هلء صرت عم حب سفراء اخوية :wink:
(ما تقلبوا بلادة ما قصدي السفراء نفسون قصدي القسم :P )


3- قسم ما بتحبو أو حابب أنك تغير شي فيه)

عم حاول افهم قسم بسطة اخوية ما عم اقدر :oops:


4- لو حابب أنو يصير قسم جديد بالأخوية, شو حيكون موضوع هالقسم؟

و انا ما خاطر ببالي شي هلء



5- ظاهرة أو عادة بالأخوية تحبها)


بحب كيف الاعضاء بيمزحو مع بعض و قت الجد بيتناقشو يعني بحس معظم الاعضاء هون بيحبو بعضون عنجد
(بعرف رح بكيكون)


6- ظاهرة أو عادة بالأخوية تكرهها

اي كان في ظاهرة قديمة كنت اكرها بس ما بعرف اذا اساتا لهلء :frown:
و هية ظاهرة شكر الشكر يعني اذا مخلوق كتب موضوع و شكرو العالم بيضل يشكرون و يشكرو يشكرون و يشكرو لحتى ما بقا :jakoush:


- عضو مميز بالنسبة لألك وليش ( اذا محتار بين تنين أو تلاتة حطون...مافي مشكلة)


كان و صار عندي رفقات اعزاء هون بس رح قول عصعيد الاعضاء هون
ياس غير انو صرنا صحبة كتير من فترة دايما بيفاجئني بارائو و كتير بنبسط انا و عم اقرا شو بيكتب
سعيد بحسو انسان كتير طيب و بحب نفسيتو كتير
حشت نشت كل ما احكي معو بحس عم احكي مع اهلي 8) لانو كل الوقت بحسو عم بيبهدلني(والمشكلة انو معظم الاوقات بيكون معو حق :frown: )
جو مواضيعو شيقة و اكتر من مرة بيكون عندي نفس الرد يا ما بيكون عم اعرف كيف بدي وصلا(و كتير بتصير :pos: )يا بيسبقني و بيكتب نفس الفكرة او التعليق


8- عضو بتضحك معو كتير و بتتسلى بكتاباتو

هلء الغالبية الساحقة كتير مهضومين
بس بيضلو ردود ديموزي الارشيتكتر و حشت نشت غير شكل و ما بعرف اذا بتصدقو اني كتير بنبسط بردودي 8)
(انا من النوع يلي بينبسط بحالو :oops: )


9- رسالة اعجاب لعضو أو أكثر ( اعجاب بالمشاركات وكذا...مو تقلبوها غزل هلأ :lol: :lol: )

اي معماري فارس جيني كينغ رورو جينو اطرميز زيتون فيليب (مع انو نسي اسمي مرة :jakoush: )
انا بحب معظم كتاباتكون و بتصور ما صدف رد او موضوع انتو كاتبينو و ما قريتلكون يا
يعني بعمل بحث و جميع المشاركات و بشكركون على..........حااااااجة :pos:


10- رسالة عتب لعضو أو أكثر..

عتب لهــــــــون ليــــــش لا ما بعتب عحدا كل واحد بيعمل يلي بيريحو و ما الي عند حدا شييييييي :)


11- شو رأيك بالمشرفين بشكل عام.

المشرفين مناح يعني بحسون كتار :roll:


12- أي ملاحظة سلبية أو ايجابية بالنسبة لعمل المشرفين.

يا شوية تفاهم اكتر يا العلة فيني :roll:

14- مساحة حرة ( اكتب شو ما بدك يعني...عكيفك)


اي بحب قلكون اني اشتقتلكون كتير صارت شغلة و مشي الحال و مع انو ما كنت عم اكتب شي بس تقريبا معظم المواضيع
كنت عم اقراها
بالفترة السابقة جربت و اشتركت بغير منتدى بس ما كنت اكتب شي لاني ما طقت او ما كان الي نفس يمكن اتعرف ععالم غيركون
و عنجد شكرن كتير للاشخاص يلي بعتو ايميلات و سالو :D :D

طيب حاسة حالي كتير مقتة غيرو الموضوع :frown:

[Geeny]

1- شو رأيك بالأخوية بشكل عام؟
موقع حلو كتير كونو عن جد بيعرفك على ناس جدد مثقفين و فهمانين بعالم صرنا نفتقر فيه متل هدول الناس و اكيد بعرفك على ناس شقر و هيدا اهم شي :P
2ـ شو أكتر قسم بتحبو بالأخوية؟
الخواطر و الخربشات و أنا بصراحة ما كتير بدخل على غير منتديات
3- قسم ما بتحبو أو حابب أنك تغير شي فيه
حوار الأديان فكرة بتجنن بس مشكلتنا انو مندخل عليه يا قاتل يا مقتول يعني منحول الحوار لجدل و ما منوصل لشي بس يا ريت يلي بدو يفوت على هيدا المنتدى ينسى كل شي تعلمه بالمدرسة و من أهله و يدخل يدور على الحقيقة و على الله مو يدخل ليعرض القرآن أو يفسر الانجيل
4- لو حابب أنو يصير قسم جديد بالأخوية, شو حيكون موضوع هالقسم؟
أنا ما فكرت بمنتدى جديد بس كتير بشجع فكرة منتدى علم النفس لانو بيهمني هيدا الموضوع و منتدى لمناقشة الجسد و معرفة أبعاده يعني بدون تعقيد و خجل و مراقبة و الخ
5- ظاهرة أو عادة بالأخوية تحبها
بحب انو لما كون لحالي بيكفي انو افتح الموقع لحس انو مو لحالي و مرة من زمان كنت كتير تعبانة و كتبت رسالة وداع و كانت الردود بتعقد وقتها حسيت أنو أخوية أكتر من موقع على النت
6- ظاهرة أو عادة بالأخوية تكرهها
الشباب كفوا و وفوا أنا ما بحب تمسيح الجوخ و كتر السلامات و المواضيع يلي بتنفتح بقلب مواضيع يعني كل شي بوقته و بموقعه حلو
7- عضو مميز بالنسبة لألك وليش ( اذا محتار بين تنين أو تلاتة حطون...مافي مشكلة
بصراحة كتار كتير و كل واحد معزتو شكل بس بدي أذكر نبيل لأنو اول مين استقبلني و ابو مارال و ابو نهلة وابو ميشيل و غياث و الكينغ و اكيد ديمو حبيب قلبي و انمار و شوكوزولو و كرم واسفة اذا نسيت حدا
8- عضو بتضحك معو كتير و بتتسلى بكتاباتو
أبو نهلة و هل يخفى القمر :P
9- رسالة اعجاب لعضو أو أكثر ( اعجاب بالمشاركات وكذا...مو تقلبوها غزل هلأ )
ديموزي الغالي اول انسان بيصدمني بكتاباتو و كتير كتير بحبها و بحس فيها عمق
10- رسالة عتب لعضو أو أكثر..
ما بدي اعتب على حدا الله يسامح الكل بس يلي بدو يحاور يعرف حدود الاحترام بالحوار
11- شو رأيك بالمشرفين بشكل عام.
على راسي كلهم و لو اني ما بعرف المشرفين الجدد ( هلأ انا عم مسح جوخ ) :lol:
أي ملاحظة سلبية أو ايجابية بالنسبة لعمل المشرفين
احيانا و بس احياناً بينكتب شي ما لازم ينكتب و المشرفين ما بينتبهوا لبعد فترة بس هيك
14- مساحة حرة ( اكتب شو ما بدك يعني...عكيفك)
عندي سؤال وين راح سؤال 13 و لا رقم سيء يعني؟
أنا بدي قول للكل الله يعطيكم العافية بس بصراحة الموقع تغير مو شوي كتير و ما حدا يزعل بس لما عم فوت على اي منتدى عم شوف نفس الاسماء يعني ناس نشيطة و ناس نايمة و انا حاليا ماني فاضية بس لسه ما تأقلمت مع التغير يلي صار بالموقع معي معي بمشي ما هيك :oops:
:D

[Geeny]

:D

[magic76]

معي معي بمشي ما هيك

ما تشدي ايدك كتير

[butterfly]

1- شو رأيك بالأخوية بشكل عام؟
أخوية بيتي ...
أخوية مجتمع سوري غني ومتنوع ... اعطاني كتير كتير كتير ...وغير بحياتي جدا ً
2ـ شو أكتر قسم بتحبو بالأخوية؟
:lol: الحقيقة سؤال صعب .... :p أكيد ... المكتبة .. ( والمسرح .. بحسو أبني :pos: )
3- قسم ما بتحبو أو حابب أنك تغير شي فيه
أخبار الفنانين والنجوم ... حابة سكرو :fthink:
4- لو حابب أنو يصير قسم جديد بالأخوية, شو حيكون موضوع هالقسم؟
:? ما بعرف .. حابة نفصل الفلسفة عن علم النفس
5- ظاهرة أو عادة بالأخوية تحبها
كتير كتير اشيا صعب اني عدن
6- ظاهرة أو عادة بالأخوية تكرهها
المواضيع اللي فيها مشاكل كل الناس بترد عليها ..
7- عضو مميز بالنسبة لألك وليش ( اذا محتار بين تنين أو تلاتة حطون...مافي مشكلة)
مورنينغ طبعا ً :lol:
Yass و إمرأة من ورق
ومن الجدد اللي عم يلفتو نظري هلق :
ooops و moon lights
8- عضو بتضحك معو كتير و بتتسلى بكتاباتو
:lol: حسن ... وأبونهلة
9- رسالة اعجاب لعضو أو أكثر ( اعجاب بالمشاركات وكذا...مو تقلبوها غزل هلأ :lol: :lol: )
اوف ... في كتيرين عاجبيني ... :pos:

10- رسالة عتب لعضو أو أكثر..
كابي ... والله حرام هالتعصب كلو ... :frown:
وللحكيم :pos::pos:
11- شو رأيك بالمشرفين بشكل عام.
بيجننو :gem:
12- أي ملاحظة سلبية أو ايجابية بالنسبة لعمل المشرفين.
الله لا يحرمني منكن كلكن كلكن ... احلى عيلة :oops:
14- مساحة حرة ( اكتب شو ما بدك يعني...عكيفك)
:lol: شكرا ً اخوية ..
بغار عليكي كتير ..
وبخاف عليكي .. وبحبك
ولو بقدر اعطيكي اكتر من اللي عم اعطيه اكيد ما رح ابخل
بحبكن
تحياتي :D :D
وهي نكشة :gem:

:mimo:

[BL@CK]

حوار الروح....يعني لهلق انا ما فهمت انو شو بينحكى بهاد القسم .؟؟؟ انو يعني روح ولا تطول مثلاً ؟ ولا روح القلب داعيلك


:lol::lol::lol:

[LiOnHeArT.3LA2]

1- شو رأيك بالأخوية بشكل عام؟
بشكل عام ,, رائع ,, متميّز ,,بيتي


2ـ شو أكتر قسم بتحبو بالأخوية؟
في عدة اقسام بس اكتر شي

الخواطر والخربشات ,, والمنبر

3- قسم ما بتحبو أو حابب أنك تغير شي فيه

المعتقل ,, لأني بحس المعتقلين ما لازم يكتبو


4- لو حابب أنو يصير قسم جديد بالأخوية, شو حيكون موضوع هالقسم؟

هلأ الموضوع كان من زمان ,, فليذالوكا هلأ اخوية شامل ,,

5- ظاهرة أو عادة بالأخوية تحبها

الألفة ,, والمحبة ,, والطيبة

6- ظاهرة أو عادة بالأخوية تكرهها

ما بالأخوية,, ببعض الاشخاص العقلا مسكر,,, واللي ما بيتغير شي بحوارن

الخروج عن الموضوع ,, والمواضيع اللي فيها مسبّات ,, عدد المشاركين يتجاوز العشرطعشر الف

وشو كمان ,, انو بيئرو اسم الموضوع وبيفوتو يردو من دون ما يعرفو شو الموضوع;)

7- عضو مميز بالنسبة لألك وليش ( اذا محتار بين تنين أو تلاتة حطون...مافي مشكلة)

باشق,,ريحانة,, ماتيا ,, ياسو=yaso ومين كمان اي وياس

8- عضو بتضحك معو كتير و بتتسلى بكتاباتو
كلياتن اعضاء قدما ,,
كريم ,, ابو النسيم ,, " مع اني ما كنت بوقتهن بس بحب التحشيش تبعهن

أما بالنسبة لهلأ كمان قدما بس يعني لساتن موجودين نيرفانا وابو سليمان

هلأ في العميمة ,, وميدو


9- رسالة اعجاب لعضو أو أكثر ( اعجاب بالمشاركات وكذا...مو تقلبوها غزل هلأ :lol: :lol: )

ماغنوم ,, تقبر قلبي ما اسرعك

مرسيل ,, عنجد يعطيكي العافية

ياس ,, الله يصبرك

نبيل ,, الله يرحمها ,,



10- رسالة عتب لعضو أو أكثر..
ممممممممم ما بعرف ما تعوّدت عاتب

gepral: "ما بعرف ازا كاتب الاسم صح : حبيبي روّق شوي وبلا هالجنان

11- شو رأيك بالمشرفين بشكل عام.

المشرفييين بربي سكّرة المنتدى ,, والله يعطيهون العافية

12- أي ملاحظة سلبية أو ايجابية بالنسبة لعمل المشرفين.

يا شباب روئو شوي عالمشرفين ,, بربي ما بيطيرو

14- مساحة حرة ( اكتب شو ما بدك يعني...عكيفك)
أخوية ,, شكرا الك على تعليمي كتير شغلات حلوة ,, وعلى تنبهي لكتير شغلات بشعة



تحياتي :D :D

ياس,,, بربي خوتتني ,, قلت يا الله شو رجع الشباب الطيبة

عالهامش : كلياتن خضر ما شاء الله اللي رادين عالموضوع ما في غير انا وبلاك :o

الله يخليلنا اللون الازرق:D

[LiOnHeArT.3LA2]

10- رسالة عتب لعضو أو أكثر..
ممممممممم ما بعرف ما تعوّدت عاتب

gabriel: "ما بعرف ازا كاتب الاسم صح : حبيبي روّق شوي وبلا هالجنان,, وأهضم شي انك بدك أرضية مشتركة;)

extormia : و يــــــــــــنـــــــــــ ك؟؟؟؟:cry:


رجعت تأكدت من الاسم ,,
:o

[sweetbaby]

1- شو رأيك بالأخوية بشكل عام؟
اخوية شي من الاشيا الحلوة اللي صارت بحياتي
عرفتني ع عالم كتير لولاها بحياتي ماكنت عرفتون وحتى قوت علاقتي بعالم ماكانت قويت بدونا متل شوش ومجد( الله يزكرو بالخير) وخسرتني كتيير عالم كمان
بس بتضل المجتمع الصغير اللي بيضل حاويني

2ـ شو أكتر قسم بتحبو بالأخوية؟
الاداري:p
لا بس بحب الصالون والاقتصاد
وبحب المنبر بس متل ماقال ديموزي كمان بخاف شارك فيو مع انو المشرف كتيير كوول ومافي متلو

3- قسم ما بتحبو أو حابب أنك تغير شي في
حوار الروح

4- لو حابب أنو يصير قسم جديد بالأخوية, شو حيكون موضوع هالقسم؟
هممممم :fthink:

5- ظاهرة أو عادة بالأخوية تحبها
المحبة اللي بتضل ظاهرة بيناتنا

6- ظاهرة أو عادة بالأخوية تكرهها
همممم كمان:fthink:

7- عضو مميز بالنسبة لألك وليش ( اذا محتار بين تنين أو تلاتة حطون...مافي مشكلة)
في كتار كتيير
بس مارح قول مشان ماانسى حدا.. بس سارة اكيد طبعا وريم

8- عضو بتضحك معو كتير و بتتسلى بكتابات
الله يذكرك بالخير ابو نهلة ومجووود:cry:

9- رسالة اعجاب لعضو أو أكثر ( اعجاب بالمشاركات وكذا...مو تقلبوها غزل هلأ :lol: :lol: )
بدي اقلبها غزل وحط ياسوووو:sosweet::o

10- رسالة عتب لعضو أو أكثر..

رغيد ونانا وفيليب(مع اني عم حاكيه كل نهار بس ماعم نشوفو هون) وجورج الغالي(كاكابودا) ومجوود

11- شو رأيك بالمشرفين بشكل عام.
احسن من هيك مننتزع

12- أي ملاحظة سلبية أو ايجابية بالنسبة لعمل المشرفين.
:lol::cry:
يعطينا العافية

وين رقم 13

14- مساحة حرة ( اكتب شو ما بدك يعني...عكيفك)

بعدين بعدين:fthink:

[MaTyA]

1- شو رأيك بالأخوية بشكل عام؟

حلوة ..
بحب بالاخوية انو في ناس كتير بتناقش بعقل..
يعني مانو فكر مغلق ومنزوي..

2ـ شو أكتر قسم بتحبو بالأخوية؟

الصالون + المكتبة كتير مرتبة

3- قسم ما بتحبو أو حابب أنك تغير شي فيه

ما بعرف..ما ببالي شي..

4- لو حابب أنو يصير قسم جديد بالأخوية, شو حيكون موضوع هالقسم؟

كمان ما ببالي شي..اسم الله..قلّة اقسام؟:lol:

5- ظاهرة أو عادة بالأخوية تحبها

العقلانية...والوعي..والمحبة الموجودين..

6- ظاهرة أو عادة بالأخوية تكرهها

احيان بيصير اهانات...يعني تجريح فينا نقول..
بس الله يخليلنا تقرير المشاركة العاطلة :p

7- عضو مميز بالنسبة لألك وليش ( اذا محتار بين تنين أو تلاتة حطون...مافي مشكلة)

مميزين؟! والله كتار يابا..كل اللي بملفي :lol: + ASH هو بملفي بس بنذكرو كمان مرة...+ مادماكس لانو عنجد "وردة هالشب"..+ بلاك والسبب لانو بحسو بينرفز :lol: ..لو اصغر مني كان قلنا طالعلي :p.. اي كمان مشرفات متل ميمو لانو كتير بتعطي من قلبها..ومريومة بحسها كتير طيبة ... الخ...ادا تذكرت برجع بذكرهن...

8- عضو بتضحك معو كتير و بتتسلى بكتاباتو

مادماكس..عم نعملك دعاية :lol:

9- رسالة اعجاب لعضو أو أكثر ( اعجاب بالمشاركات وكذا...مو تقلبوها غزل هلأ :lol: :lol: )

رسالة لـ اللي ذكرت انهن مميزين..مممم رسالة...يلا بالمختصر ::

انتوا كتير أمامير وروعة :D.. لأ هاد السمايلي احسن :mimo: لانو بتحبو مرسيل :p

10- رسالة عتب لعضو أو أكثر..

اسير التشرد...يعني احيان بيكون عدائي شوي :D

11- شو رأيك بالمشرفين بشكل عام.

حبابين..بيجاوبوا على الاسئلة :lol:...

12- أي ملاحظة سلبية أو ايجابية بالنسبة لعمل المشرفين.

سلبية معي لحد الآن ما صارت..
بس ايجابية انو في مشرفين عنجد بيعطوا من القلب متل ميمو :D

14- مساحة حرة ( اكتب شو ما بدك يعني...عكيفك)

شو بدي اكتب..اي..يعني ادا نسينا نذكر اسم شي حدا من المميزين بالنسبة الي بالرغم من انو هني مميزين فـ نأسف..بيكون خانتنا الذاكرة..وشي كتير بحب قولو..انو في كتار بالاخوية عاقلين وواعين ومحترمين عنجد..

ميرسي ياس :D

[MaTyA]

اي تذكرت..نسيت قول انو من المميزين كمان ظل جيفارا ومايسترو :D


ورامي.. لعما على هالنسوة :lol:

[..AHMAD]

هلئ انو القصة بما انو صار فيها اعتبارات على اعتبار انك استلمت زمام المبادرة فانا بعتبر انو حاجتي لعي وخليني فوت بالموضوع


1- هاد يا سيدي هون انا بظن انو اخوية اكبر من انها اعطي رأيي فيها يعني مانها بحاجة رأيي بس على اعتبار انو انحطيت تحت الامر الواقع فاستلم لقلك :
انو اخوية رائعة بكل مافيها بحلوها وبمرها باعضائها مشرفينها مواضيعها اللي ما بتخلا من المشاكل والردود اللاذعة وكمان شغلة انو مواضيعها مستحيل لاقي في موضوع محطوط بغير مواقع بالعكس كتير مواضيع من اخوية منشورة بغير منتديات يعني شو ما بدي احكي بكون ماحكيت كل شي

2-هاد يا سيدي بالنسبة الي بتواجد اكتر شي بالمنبر والسقيفة والمكتبة والموسيقى ( مثقف عاساس ) بس هالفترة مقصر كتير بحق اخوية لدرجة ضغط شغلي عمخليني اطبع المواضيع على ورق ابيض وروح عالبيت جهز الردود وتاني يوم ارجع ابعتن لديئ الوقت بس الا ما ينفك هالضغط قريباً
3-هلئ كل الاقسام شغالة وعين الله عليها الا الصالون زاعجني كتير حالتو اللي وصللها يعني صار الصالون مزج بين السقيفة والملطوشات وعالطاير طبعا مو كل الاعضاء بينطبق عليهن هالحكي دايما في استثنائات بس الغالبية ماعمتعرف تشتغل صح بالصالون
4-مافي شي حاليا بس يستجد شي منبقى منخبركن
5-اكتر شغلة بحبها هون انو الواحد من اول ما يفوت بحس حالو صار من العيلة واخ وما بحس حالو غريب
6-في كتير مواضيع ما عمتاخد حقها من المشاركات ما بعرف العطل من الاعضاء ومنهن انا او العطل من طريقة الطرح للموضوع بالاضافة لشغلة انو كتير مواضيع جدية عمتنقلب هزلية
7-Yass – Butter Fly
8- MadMax
9- MadMad – Matya – Yass – ButterFLy - تائه
10- الي اكيد بسبب هالتقصير
11- مبهن شي ... معن معن بيتعلمو المصلحة:P
12 – لا لا ما عليهن حكي المشرفين بس في كم مشرف ما بعرف شو ظروفن بس ما عمشوفن كتير ... Nirvana + Sabe + Sezar
14 – ما تقربوني عالحريات :P صحي عسيرة المساحة الحرة .......... شو وضع ال 13 من الاعراب ياس