أريد أي شيء من الأدب أو الفن البدوي [الأرشيـــــف]

Joe

19/02/2005, 06:25

مرحبا شباب
حابب اطلع شوي على أي نتاج فكري بدوي
ان كان أغاني او شي... شعر مثلا
يعني حتى لو أغاني بسيطة كتير او مواويل...

بس هلق بالله أغاني هل عرب مثل خمس صبابا, دقوا المهباج ... هدول بداوة لما فلاحين؟

شكو زولو

19/02/2005, 12:09

بس هلق بالله أغاني هل عرب مثل خمس صبابا, دقوا المهباج ... هدول بداوة لما فلاحين؟

و الله يا صديقي هدول دولة مستقلة بحد ذاتا و ما فيك
تحدد النوع تبعون لأنو هدول برأيي اسمن
هوشة عرب
:gem: :gem: :gem:

yass

19/02/2005, 15:24

مرحبا شباب
حابب اطلع شوي على أي نتاج فكري بدوي
ان كان أغاني او شي... شعر مثلا
يعني حتى لو أغاني بسيطة كتير او مواويل...

بس هلق بالله أغاني هل عرب مثل خمس صبابا, دقوا المهباج ... هدول بداوة لما فلاحين؟

و الله يا باشا بالفن البدوي ما كتير بفهم بس بالفن الشاوي ( حاكم أنا نص شاوي لأنو أبي شاوي و أمي اسبانية من أصل ايرلندي...شوف عالخلطة) ممكن أساعدك لأنو كتير بحب الشعر و الأغاني تبعون ( الموليا متلا , العتابا, السويحلي, اللأبوذية.....) شي رائع فعلا....ألك مني موضوع كامل عن الأنواع والأصول لأنو موضوع كتير حلو يعني....

Kakabouda

19/02/2005, 20:18

اايوم حر و حيرة و شدة راجع الخيمة اتغدا قلتلهم و شلي صار قالوا نامت بنت المختار ..
بنت المختار حلوة و عشاقينها كثار ..
هذي القصة قصة حمدا .. حمدا الرمش اللي ما يتحدا .....
طبعاً طويلي شوي بس رائعة .. للشاعر عمر الفرا ..
تحياتي و ان شاء الله كون فدتك ..
:D :D

Joe

19/02/2005, 20:20

بس هلق بالله أغاني هل عرب مثل خمس صبابا, دقوا المهباج ... هدول بداوة لما فلاحين؟

و الله يا صديقي هدول دولة مستقلة بحد ذاتا و ما فيك
تحدد النوع تبعون لأنو هدول برأيي اسمن
هوشة عرب
:gem: :gem: :gem:

ع راسي
:lol:
بس جد ...
أنا مهتم لانو حابب اعمل متل دراسة عن العلاقة بين الفلاح و الراعي بالمنطقة السورية و العراقية
مثلا في كتير أدلة من التاريخ:
-قابيل و هابيل (الفلاح قتل الراعي)
-تموز الراعي مات و الفلاح عاش
-و غيرون كتير... بس المشكلة انو كل هاد هوي أدب حضري... يعني أدب مكتوب بقلم الفلاح.. بينما انا حابب شوف القصة من طرف البدوي....

هلق مثلا سمرا و انا الحاصودي غنية فلاحية درجة أولى و واضح العداء بين الفلاح و الراعي (لألعن بي الرعيان)

و مثلا ببعض مواويل وديع الصافي... مفروض هوي ابن ضيعة زراعية... بيحكي كمان عن البدو و الرعاة.. أحيانا كلام كويس و أحيانا كلام ما فهمت شو القصد. بس لفت انتباهي عبارة: "من جيرة الراعي و عيطة الناطور".. كناية على أن البدوي بيعتدي على أرض الفلاح و الفلاح عم يستنجد (بس هاي مل كل الحقيقة)

بينما بغينة خمس صبايا واضح انو المغني بدوي لانو بيحكي عن الصحرا و البدوية
بس ما جاب سيرة أي نزاع
يمكن ما يكون سهل لاقي شي يفيد... بس يمكن لو كان عندي شي عشرين غنية او أبيات شعر... أقدر استخلص شي شغلة

و هون بقى بدي مساعدتكم لاني بكندااااااااا... ما في بدو هون دورت كتير :P... بس في اسكيمو اذا حدا بيحب يبادل :wink:

بقى يا ريت اذا حدى عندو اي مصادر

(مثلا عمر الفرا بدوي لما شو؟)

و شكرااااا

Joe

19/02/2005, 20:21

مرحبا شباب
حابب اطلع شوي على أي نتاج فكري بدوي
ان كان أغاني او شي... شعر مثلا
يعني حتى لو أغاني بسيطة كتير او مواويل...

بس هلق بالله أغاني هل عرب مثل خمس صبابا, دقوا المهباج ... هدول بداوة لما فلاحين؟

و الله يا باشا بالفن البدوي ما كتير بفهم بس بالفن الشاوي ( حاكم أنا نص شاوي لأنو أبي شاوي و أمي اسبانية من أصل ايرلندي...شوف عالخلطة) ممكن أساعدك لأنو كتير بحب الشعر و الأغاني تبعون ( الموليا متلا , العتابا, السويحلي, اللأبوذية.....) شي رائع فعلا....ألك مني موضوع كامل عن الأنواع والأصول لأنو موضوع كتير حلو يعني....

ع راسي أبو مارل
بس شو يعني شاوي بالضبط
يعني كلمة شاوي متداولة كتير بس شو معناها الحقيقي عاد
و اكيد موضوعك رح يكون مهم كتير و ناطرينك

تحياتي

Joe

19/02/2005, 20:23

اايوم حر و حيرة و شدة راجع الخيمة اتغدا قلتلهم و شلي صار قالوا نامت بنت المختار ..
بنت المختار حلوة و عشاقينها كثار ..
هذي القصة قصة حمدا .. حمدا الرمش اللي ما يتحدا .....
طبعاً طويلي شوي بس رائعة .. للشاعر عمر الفرا ..
تحياتي و ان شاء الله كون فدتك ..
:D :D

تسلم يا غالي
بعرفها قصة حمدا... شغلة عظيمة
رح شوف اذا بلاقي ديوان عمر الفرا على الانترنت

آخيل

20/02/2005, 02:53

اايوم حر و حيرة و شدة راجع الخيمة اتغدا قلتلهم و شلي صار قالوا نامت بنت المختار ..
بنت المختار حلوة و عشاقينها كثار ..
هذي القصة قصة حمدا .. حمدا الرمش اللي ما يتحدا .....
طبعاً طويلي شوي بس رائعة .. للشاعر عمر الفرا ..
تحياتي و ان شاء الله كون فدتك ..
:D :D

تسلم يا غالي
بعرفها قصة حمدا... شغلة عظيمة
رح شوف اذا بلاقي ديوان عمر الفرا على الانترنت
له له له طيب سمعتو قصيدة حمدا تبع لعبة التريكس ؟؟؟؟؟؟
هذي القصة……قصة حمزة ……حمزة الشب اللي يتحدى
حمزة كان لعيب شدة……حمزة كان ملك الشدة
حمزة يلعب …حمزة يغلب……حمزة ما كان حدا قده
و في يوم، عملوا دوري شدة……الدوري كان فوق المدة
اليوم الأول جابوا الشدة…اليوم الثاني عملوا القعدة.…و يوم الجمعة فتوا الشدة
قعد حمزة…و قعد قبالو حمزة شريكه
فتت لعبت و ما بتفرش اللعبة
حمزة أتبهدل طول اللعبة
اجت مملكة حمزة……طلب حمزة شيخ الكبة

سمى حمزة ……سمى حمزة شيخ الكبة
و لبسوا حمزة!!!
عصب حمزة…خشب حمزة…و صاح بشريكه
ما اريدك ما اريدك……حتى لو تفوزني بايدك… ما اريدك
صاحبي و مثل اخويا……لكن ما بلعب شريكك
تلبسني شيخ الكبة بايدك؟؟؟
طالب سنك و الجويزة بايدك…… بتقلك ارميني من ايدك
مقطش بستونى……و اللون مليان بايدك
ما اريدك…ما اريدك…لو انقطعوا كل اللعيبة ما اريدك
حلفوا الشباب…و ترجوا حمزة…و قالوا كمل
كمل حمزة و قال لشريكه……العب صح وإلا أبيدك
و مشت اللعبة…و كمان مرة سمى حمزة شيخ الكبة
من تاسع فتحة…برقت برقة…و هبت ريح من شرقه
و فلتت ورقة…فتح شريك حمزة جويزة الكبة
فرش حمزة…..إنعجك حمزة……و لبس حمزة شيخ الكبة
حمزة اتعجب…حمزة اتدعدر…و بوجه شريكة ضرب الشدة
حمزة اتكركب…و هو يعد و يحسب…قلوا بتفتح كبة؟؟ ولك العمى ضربك من قص الكبة تهرب
حمزة سكت…حمزة انعبط…حمزة انجلط
فرطت اللعبة…و معها فرط حمزة…مات حمزة…حمزة مات فوق الشدة
كل لعيبة التركس مشوا ! بجنازة
حلفوا اللعيبة……بليلة جمعة
و فوق القبر الضامم حمزة
حلفوا انهم سمعوا حمزة!!!
من جوا القبر ...يصيح و ينده
يلعن شرفك … بتفتح كبه ؟؟؟!!!!

HashtNasht

20/02/2005, 04:34

مرحبا شباب
حابب اطلع شوي على أي نتاج فكري بدوي
ان كان أغاني او شي... شعر مثلا
يعني حتى لو أغاني بسيطة كتير او مواويل...

و الله يا ابو شريك طلبك من النوع السهل الممتنع ..و لقلك ليش:

سهل كتير اني جبلك 1000000000000 قصيدة واغنية بدوية...من الأردن ( سكان الأردن اما من البدو أو الفلسطينيين ) . أو من الخليج العربي ...أو من سوريا . بس صعب كتير انك تعتبر هالقصيدة نتاج فكر بدوي.
الفكرة أنو البداوة فقدت معناها من فترة قصيرة نسبياً ...بس فترة مهمة بنفس الوقت ...يعني أنا مرة التقيت بشب بدوي من نفس عمري و بيشتغل برعي الغنم ...يعني بدوي مثالي و حتى انو محافظ ع اللباس التقليدي . و اتفاجئت بالحديث اللي دار بيناتنا .
الفكرة اللي وصلي ياها الشب كالتالي : لحتى تكون بدوي لازم تعيش البداوة ..بالاضافة الى كونك تحمل نسب لعشيرة أو قبيلة معينة..موضوع النسب مستمر و هو الشي الوحيد اللي مخلي البدو لحد هلق اسمن بدو ...وسلطة العشيرة والقبيلة موجودة ع الارض حالياً و بقوة ..و هاد الشي اللي منشوفو بانتخابات مجلس الشعب . ( نسبة البدو في سوريا 2% من السكان بينما تزيد نسبة البدو في مجلس الشعب عن 10 % و السبب هو ان للعشيرة صوت واحد لا يمكن اختراقه بالاضافة لاسباب اخرى ) . أما الجزء التاني من شخصية البدوي ..فهو حياتو اليومية ...الخيل ..الحلال ( الغنم ) الترحال و التنقل ....الغزو ....السلاح ...الحب المستحيل ....الخ

الفكرة انو البدوي تعرض لصدمة كبرى خلال ال 50 سنة الاخيرة ...صار بدل الخيل في رانج روفر ...و بدل الربابة صار في دش ( طبعاً مو ع سطح الخيمة ..حد الخيمة ) و بدل عيون الحبيبة من خلف الخمار ..صار في افلام اخر الليل .... و بدل الغزو صار البدوي بيشتغل بالتهريب ...كل أنواع التهريب ...يعني سقطت اهم قيم ومفاهيم بحياة البدوي .....و النتيجة أنو هو حقيقة ما عاد بدوي ..و بالتالي نتاجو من شعر او اغاني لا يمكن اعتبارو نتاج بدوي ان كان في الخليج او في سوريا او الاردن او العراق .

المشكلة انو التراث البدوي الموثق نادر جداً ( خصوصاً بعد ما تم اتلاف مئات الاشرطة في اذاعة دمشق كانت نتاج سنوات من الارشفة في البادية السورية كان من الممكن انها تكون مرجع لا يقدر بثمن ) و التراث الموجود بالذاكرة حالياً ما حدا عم يحاول يجمعو بطريقة جدية ...
من وجهة نظر تانية . غالبية الشعر العربي القديم هو شعر بدوي حقيقي ..من عنترة الى الصعاليك ..الى طرفة ...الخ و خاصة الادب الجاهلي .

بخصوص موضوع كره الفلاحين للبدو ..هدا شي اقل من طبيعي ..لأنو من المعروف انو بعض البدو في سوريا ولبنان كانو يشتغلو مرتزقة لأي جهة بتدفع مصاري او مقابل جزء من الغنائم ...( البدو ساهمو بمجازر العثمانيين ضد الارمن مقابل انو ياخدو الدهب من القتلى ...البدو كانو الصف الامامي للجيش الفرنسي اثناء الانتداب ..البدو كانو يقومو بعمليات الغزو و التخريب نيابة عن بعض الامراء فترة حكم فخر الدين في جبل لبنان ...وصولاً الى غزو دمشق ... ) ايضاً الغزو كان احد اهم مصادر الدخل للبدو فترات الجفاف ..بكل بساطة بهاجمو الضيعة و بياخدو شو ما بدهن وبيمشو من الحنطة وصولاً للنساء ( وحتى اليوم بس بدن يخوفو ولد صغير بقولولو لا تطلع ع الشارع بتخطفك البدوية )

يعني ببساطة واختصار ...تاريخ البدو الحديث و المعاصر تاريخ غير مشرف ..يعكس فترة انحطاط ان لم نقل مظاهر انقراض ..و التراث البدوي الحقيقي من ايام العز غائب و مغيب ..يعني اذا بتقدر تحصل على اي شي بتكون حصلت على شي مهم .

و موفق :D

Joe

20/02/2005, 06:12

شكرااااااا أبو نهلا

انا مدرك فكرة النزاع و الغزوات... بس الفكرة انو كل القصص منسمعها من طرف الحضري و بدي شوي بشو بيتغنى البدو و شو بيكون محتوى اغانيه الحزينة

يعني التاريخ بيحكيلنا دائما عن اعتداء البدوي... بس نحنا مننسى انو في اعتداء متواصل و طويل بس بطيء هوي اعتداء الحضري على ارض الرعي البدوية... الحضر يلي بيمتد شوي شوي و بيحد حدود و بيزرع أراضي... و مع الوقت بيصفي البدو بلا أرض

اذا عندك شي كم شغلة بمتناول ايدك شلفلي ياهون زكاتك اذا بتقدر... بجرب حظي و بشوف شو بيطلع

مشكور كتير على المعلومات

Joe

21/02/2005, 07:39

أبو نهلا في مجال عذبك و تحكيلي شوي عن قصة الاتلاف... كيف صارت و ليش و شو كان في بالضبط؟

HashtNasht

21/02/2005, 08:08

أبو نهلا في مجال عذبك و تحكيلي شوي عن قصة الاتلاف... كيف صارت و ليش و شو كان في بالضبط؟

الموضوع مضى علي اكتر من سنتين ...ماني متذكر بالضبط..بس انحكى عنو كتير باكتر من جريدة سورية.

الخلاصة انو يحيى الشهابي و اخرون كانو يعملو جولات بالبادية والريف السوري...و يسجلو الاغاني و ( الاهازيج :P ) الشعبية بكل منطقة باصوات الناس اللي بغنو بكل منطقة...يعني بكل ضيعة بكون في مطرب شعبي بغني بسهرات الضيعة او مرة ختيارة بتعرف كم موال ...اي شي ...كلو كان يتسجل و يتأرشف . و الهدف الأصلي للمشروع كان انو يعملو مقارنة باللحن و الكلمات بين المناطق المختلفة...يعني الدلعونا مثلاً كيف ابن صافيتا بغني الدلعونا وكيف ابن صدد بغني الدلعونا ...و شو بيستخدمو الات موسيقية ..و هيك شغلات .

الفكرة انو بيوم واحد قرر احد الفهمانين انو هالاشرطة اللي صرلها سنين قاعدة بالمستودعات ..و باعتبارها غير صالحة للبث الاذاعي ( شي سوفاج لأنو ) و مشان ما يصير هدر للمال العام ....راحو محو الاشرطة وسجلو عليها شغلات تانية ...يعني راغب علامة مثلاً ..أو حكم العدالة 8) .
اي و كل هالشغل اللي صار ع مدار سنوات طويلة..و اللي ما ممكن يتعوض ولا باي شكل ......بح ..ببساطة
و العوض بسلامتك ...راحت عليك :lol:

Joe

21/02/2005, 09:23

:jakoush: :jakoush: :jakoush: :aah: :aah: :aah: :aah:

:cry:
شي بيدبح يا زلمة

يعني هيك شي عن جد متل ما قلت ثروة

خسارة

rand

21/02/2005, 17:33

عنا الفهمانين كتار و الله و المتذرعين بقناع الحضارة كتار و ياريت فهمانين
:evil: بهالحضارة

آخيل

21/02/2005, 17:44

عنا الفهمانين كتار و الله و المتذرعين بقناع الحضارة كتار و ياريت فهمانين
:evil: بهالحضارة
يعني والله مظبوط هالحكي .... و هادا الشي بيذكرني بيللي صار بامتحف الوطني بدمشق سنة 1979 و اللي يعتبر كارثة حلت بالثروة الأثرية اللي ع أساس محفوظة فيه .

Joe

22/02/2005, 01:03

ليش خير شو صار كمان بالمتحف الوطني؟؟

هلق هيك بدنا نشتغل معكون
:cry:
شي خبرية مقبلة يا جماعة

آخيل

26/02/2005, 00:19

ليش خير شو صار كمان بالمتحف الوطني؟؟

هلق هيك بدنا نشتغل معكون
:cry:
شي خبرية مقبلة يا جماعة
ها دا ياسيدي سنة 1979 و ما بعرف اذا الكل عندون فكرة عن المخطط تبع المتحف الوطني بدمشق و اللي فيه بالقبو تبعو مدفن تحت الأرض اسمو مدفن يرحاي ... و يرحاي هوي رجل من أغنياء تدمر و كان الو و لأسرتو المدجفن الخاص فيهون متل كل العائلات الميسورة باعصر الذهبي لتدمر ( القرن الاول و الثاني لحد 271 م ) ... المهم هيدا المدفن منقول من مدينة تدمر على المتحف و بتنزلو عليه بدرج حجري ... فسنة 1979 كان في شخص من الناس اللي متشددة ززيادة عن اللزوم و بتعتبر أنو الآثارت الموجودة بالمتحف هي دعلية صارخة للوثنية و عبادة الاصنام ... فهيدا الشخص اختبئ بمدفن يرحاي تحت الارض بالمتحف ... و استنى لحتى خلص الدوام و صار اللي ... و كمش هالشاكوش و بلش يكسر بالتماثيل على ابو جنب ... و خصوصا الوجوه تبع التماثيل ... و بين ما طلع الصوت و كمشوه كان عمل عمايلو .... و لذالك فالعديد من التماثيل بالمتحف مو كلها مكسرة بسبب العوامل الزمنية ... لأ بسبب هالشخص هيدا ... و على فكرة هاشي هادا مو يس بيزعل لأ بيبكي كمان ... لأنو هالمجرم .. دفع كام قرش آخر الشي و طلع مجنون ... !!!
فآآآآآآآه يا بلد !!!