نظرية كارل ماركس (سؤال) [الأرشيـــــف]

عرض كامل الموضوع : نظرية كارل ماركس (سؤال)

Willi

05/02/2006, 10:03

Willi

07/02/2006, 00:05

هلق ما حدا بيعرف؟
لو قايلكون بدي غنية كان 100 ردو عالموضوع
لو قلتلكون بدي كام صورة لنانسي عجرم
كان المنتدى كلو رد

بس لما بسأل عن كارل ماركس
ما حدا حتى بيقرا الموضوع

HashtNasht

07/02/2006, 01:34

أبو شريك ...فينك تزور هالموقعين و تقرا ع مهلك

ما حدا لاحقك بعصاي

////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

و على فكرة ..مانك مضطر تفهم كلشي

هدول الفلاسفة الألمان أحيانا بيتفلسفو زيادة عن اللزوم :lol:

Willi

07/02/2006, 01:43

على راسي حشت نشت
الف شكر الك
انو يا معلم انا بس حبيت اتوضح عنها اكتر
مو انو بدي افهمها
بس يعني
شوي الفكرة ملخبطة عندي عنها

هدول الفلاسفة الألمان أحيانا بيتفلسفو زيادة عن اللزوم

خخخخخ
هاي معك حق فيها
بس يا سيدي منيح بيتفلسفو
نحنا حتى فلسفة ما بيطلع معنا

mhmary

07/02/2006, 07:24

انو شباب وصبايا
بتوقع كلياتنا سمعنا نظرية كار ماركس عن الرأس مالية

اي هلق انا سمعت فيها وقريت عنها بس للاسف ما تعمقت فيها كتير
فماني فهمانها

بتمنى انو الشباب والصبايا الطيبة يعني اللي بيعرفها
هيك يكتبلنا ياها ويشرحها
طبعا اذا مافي مانع :سوريا:

وشكرا سلفا :adal:

تعا لقلك احسن ما تفتح مواقع وتعزب حالك رح فسرلك ياها بالمشرمحي:lol: :lol:

لأ عنجد خيو بيبساطة ماركس زلمي ضل طول حياتو لحتى مات عم يدرس عن الرأسمالية.............. المهم انو نظريتو الشهيرة بتمحور حول الحكي عن مراحل تطور المجتمعات الي بيمر فيا اي بلد يعني خليك معي

أول شي بتكون الدولة بحالة اقتصادية جيدة ومستقرة وهاي الحالي الي كان يسعا الا ماركس انو تكون الطبقة الوسطة هي الأعظم (ماشي) هلق الي بيصير انو الرأسمال (الشركات الكبيرة) حقير وندل وعطول بيحاول انو يمص دم الطبقات التاني فبعد هاي الفترة من الأستقرار بيجي الرأسمال وبيصير ياخد مصاري من الطبقة الوسطة اكتر من الأول فابتدأ تقل الطبقة الوسطة وتكتر الطبقة الفقيرة وتتجمع رؤس الأموال بين طبقة صغيرة من الشعب (فهمان علي لهون)

طيب المرحلة التالتة انو هاي الحالة بتتفاقم وبيصير في مشكلة فقر بالمجتمع وكمان بيصير في غناء فاحش هون عاد بتبلش الطبقة الفقيرة تحاول تقلل من غناء هاي الطبقة والرجوع لحالة الأستقرار بس المشكلة انو بالنظام الرأسمالي ما في قانون بيحد اديش ممكن تكون ثروة الراسمالي وهادا الفرق الجوهري عن الشيوعية المهم انو الطريقة الوحيدة هي الثورة على الأغنياء وبعد هاي الثورة بتخرب البلد :lol: لأ ما بتتخرب بس يعني مثلا متل بيصير في خلل وكل دولة هي وحظا اديش مقدار الخلل مثلا

المرحلة الرابعة هي تصليح هادا الخلل فهون بتجي مرحلة الديكتاتور بيجي رئيس ديكتاتوريبيستلم البلد بعدين المرحلة الأخيرة هي ازالة الديكتاتور من خلال ثورة او بيطريقة سلمية والعودة للنظام الرأسمالي والي بيبلش بالمرحلة الأولى الستقرار وهيك بتضل تدور لحتى يفتل راسك:lol: :lol:

اي هيك هاي اذا سألك شي حدا قولو هدول بيقول عنك فهمان شو عم تحكي بس انا ما ذكرت كلشي لأنو هاي النظرية شي كتاب كامل تقريبا بس متل ما قلتلك هاد المحور تبعا وبعدين بتبلش التفرعات الي ما طبيعية

اي سؤل او شي ما فهمتو سأل ديبك انا;-) 8)

krimbow

07/02/2006, 08:13

يحرق حريشك يا ويللي على هالطلب
انو سقطت خمسطعشر مرة بالاقتصاد السياسي من ورا راس ماركس انت بدك تفهمو بموضوع ؟؟؟

خيو .. هي النظرية كتاب شي 700 صفحة .. بس رح فهمك اهم النقط

من الناحية الدينية
هاد ماركس ابوه كان يهودي بس بعدين تعمد و صار مسيحي كاتوليكي و ترك امو ... قام ماركس زعل من الله كتير و بطل يحبو ... و بعد شوي نسي انو في الله

من الناحية الفلسفية (الايديولوجية)
اجا عمك ماركس و جمع بين جدلية هيغل المادية و بين الطوباوية الفوضوية من خلال البيان الشيوعي (و لا تسألني شو هي الجدلية المادية و لا شو هي الطوباوية الفوضوية و لا شو هوي الديالكتيك التاريخي احسن ما اجي ع اميركا اضربك و ارجع ع الشام)
المهم الزلمة جمعهم و عمل الحركة الشيوعية العالمية و شعارها "يا عمال العالم اتحدوا"
حسب ديالكتيكية ماركس
المراحل التاريخية يللي مر فيها البشر هيي التالية
1- المشاعية: الارض لكل الناس، كل واحد بيقطف تفاحاتو منها و بياكل و بيعيش
2- العبودية: صار في حروب و يللي بيخسر بيستعبدو الربحان و بيبيعو و بيشتريه
3- الاقطاعية:في امير، عندو قصر، و الناس الباقيين عايشين ببيوت طين و بيشتغلو بالارض، بيجوا الاعداء ليقتلوهم بيقوم بيحميهم الامير بالقصر تبعو (شغلة بتصير مرة كل 20 سنة) بالمقابل الناس بيشتغلوا بالارض و بيعطوا الامير اكتر من نص الغلة (شغلة بتصير كل يوم) ... بحسبة صغيرة بتلاقي الامير غني كتير كتير و ايديه نضاف و باقي الناس آكلة هوا
4- الرأسمالية: واحد عندو معمل و الناس بتشتغل عندو .... و اللا قلك رح اشحها بعدين

5- يا اما بيتطور المجتمع من الراسمالية للامبريالية بسبب تراكم راس المال
يا اما بيتطور للشيوعية مرورا بالاشتراكية عن طريق الثورة

و بعدها (المفروض انو ) يعيشو البشر بثبات و نبات و خلفوا صبيان و بنات

هلأ اهم شغلة عملها ماركس هيي انو اكتشف القيمة المضافة
شو هي القيمة المضافة
انت عندك فرن خبز
حق شوال الطحين 100 ليرة بيعمل 1000 رغيف خبز
المفروض انو يكون حق الخبزات 100 ليرة
بس انت عم تبيع الرغيف بليرة
و بالتالي حق الخبزات صار 1000 ليرة
1000 ليرة حق الخبزات - 100 ليرة حق الشوال = 900 ليرة ... هي هيي القيمة المضافة
و هي بيخلقها العامل يعني بتنخلق من شغلة اسمها قوة العمل
هلأ بالرأسمالية الرأسمالي الزئبقي بيجيي بيعطي بآخر النهار للعامل 100 ليرة اجرة يومية
و بيربح هوي 800 ليرة من القيمة المضافة
العامل بياكل و بيشرب و بيدفع اجار البيت 100 ليرة
و نفس الشي الرأسمالي
بآخر النهار العامل ما معو ولا فرنك
بينما الراسمالي زاد معو 700 ليرة
بعد عشر تيام العامل معو صفر و الرأسمالي معو 7000 ليرة ....... و هيك
هاد اسمو تراكم راس المال

بعد كم سنة بتلاقي العامل بعدو متل ما هوي معتر
و الراسمالي عم يشتري قصور و معامل جديدة و ....الخ

هلأ فكرة الماركسية (الشيوعية) بتقول انو لازم القيمة المضافة تكون كلها للعمال ... و هالشي ما بيتحقق غير ازا كانت وسائل الانتاج (المعامل) ملكية عامة لكل الناس

وصلت ؟؟؟

Willi

08/02/2006, 01:55

لعمى كأنو كل واحد منكون حكى شكل

المرحلة الرابعة هي تصليح هادا الخلل فهون بتجي مرحلة الديكتاتور بيجي رئيس ديكتاتوريبيستلم البلد بعدين المرحلة الأخيرة هي ازالة الديكتاتور من خلال ثورة او بيطريقة سلمية والعودة للنظام الرأسمالي والي بيبلش بالمرحلة الأولى الستقرار وهيك بتضل تدور لحتى يفتل راسك
:shock: :shock: :shock:
هلق عم تتخوت انت ولا عم تحكي جد؟
يعني كلشي كان حلو لوصلنا لهون

يعني نظريتو بتقول
انو منحط نظام ببدايتو بكون منيح بعدين بخرب البلد بعدين منحط نظام تاني بظبت التخريب وبيرجع بخرب من جديد منرجع منرد الاولاني مشان يصلح التخريب ويرجع يخرب؟؟؟
جلطتني بهاي

(و لا تسألني شو هي الجدلية المادية و لا شو هي الطوباوية الفوضوية و لا شو هوي الديالكتيك التاريخي احسن ما اجي ع اميركا اضربك و ارجع ع الشام)

اول شغلة كنت بدي اكتبها هوي هالسؤال
بس بعدين غيرت رأيي احسن ما اكلها قتلة

هلأ فكرة الماركسية (الشيوعية) بتقول انو لازم القيمة المضافة تكون كلها للعمال ... و هالشي ما بيتحقق غير ازا كانت وسائل الانتاج (المعامل) ملكية عامة لكل الناس

وصلت ؟؟؟

فيك تقول نوعا ما وصلت

krimbow

08/02/2006, 02:39

ع راسي خيو

بس صدقا انا مو كتير فاهمها لحتى فهمك ياها اكتر

اصلا ما فيي فهمك ياها هيك قطش لحش
يعني لازم بالاول تفهم جدلية هيغل (و هي شغلة انكتب عنها معاجم و مجلدات)
بعدين لازم تطلع على نظريات آدم سميث و ديفيد ريكاردو ... لحتى تفهم شو هوي وجعو لماركس

لعمى كأنو كل واحد منكون حكى شكل

لا ابدا
نظرية الماركسية نظرية ضخمة جدا جدا و فلسفية لابعد الحدود
هلأ المعماري اجا و شرحلك شوي بالتفصيل عن شغلة اسمها "ازمة الدورة الاقتصادية الرأسمالية"
و يعني خبرك كيف بتصير الدورة الاقتصادية بالنظام الرأسمالي و كيف دايما بدها توصل لأزمة انهيار الاقتصاد (او ازمة فيض الانتاج حسب كينز) ...
والحل تبع ماركس انو لازم العمال تعمل ثورة ع الرأسماليين البرجوازيين و تأمم المعامل و وسائل الانتاج و هيك منخلص من الازمة

ازا حابب تقرا شوي
فيك تفوت ع هاللينك
////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////
هوي اكتر عن اللينينية منو للماركسية ... بس كلهم بيقربوا بعض:lol:

krimbow

08/02/2006, 02:43

و ازا حابب تعرف شو يعني ديالكتيك فيك تفوت لهون
////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

mhmary

08/02/2006, 05:39

هلق عم تتخوت انت ولا عم تحكي جد؟
يعني كلشي كان حلو لوصلنا لهون
يعني نظريتو بتقول انو منحط نظام ببدايتو بكون منيح بعدين بخرب البلد بعدين منحط نظام تاني بظبت التخريب وبيرجع بخرب من جديد منرجع منرد الاولاني مشان يصلح التخريب ويرجع يخرب؟؟؟
جلطتني بهاي

كيف يعني عم أتخوت ما فهمت........
بعدين انت الجلطني هلق بشرفك هاي الجملة بتمثل كلشي فهمتو من كلامي
ما علينا خيو ليك رح عددلك ياهون
ماركس واحد أمن بالشيوعية وكان يأمن بأنو عمال العالم لازم يتحدو وما لازم يخلو رب العمل يسيطر عليون وهادا الي عم بيصير هلق بأميركا من شان هيك هو كان عم يدرس مراحل التطور (الي كتبتلك ياهون) وهن فينك تقول انتقال بين الشيوعية والرأسمالية المهم انو عمل كتاب مع رفيقو انجلز الأنكليزي كتير مشهو كان اول شي ممنوع ينزل بعدين نزل أسمو communsit manifesto بالعربي يعني بيان الحزب الشيوعي شايف شلون هادا الكتاب بقا بيحكي عن هاشغلات بيني وبينك انا ماني قريانو بس عندي فكرة عنو

هلق رح ارجع عدلك المراحل بطريقة تاني بس ركز معي

1 بطالة شاملة بالبلد لأنو رؤس الأمول متجمعا مع طبقة صغيرة من الشعب وبعدين بيصير نوع من الثورات الناتجة على هادا الشيء
2 الأرجاع أو الأعادة يعني ارجاع الوضع وتصليح هالخلل وهادا الشي بيتم عن طريق الديكتاتور
3 أعادة توزيع الثروة مفهومة ولا لأ
4 العمل بناء على القدرة والتلقي على حسب العمل
5 العمل بناء على القدرة والتلقي على حسب الحاجة

هلق هون حطنا الجمال شايف هدول الخطوتين 4-5 الذيادة هدول هن محور الكتاب لأنو وقت بتوصل على الخطوة 4 بتصير رأسمالية وبعدين بتتطور للأمبرايالية متل بأميركا بس ماركس كان كتابو بدو يوصل العالم ل 5 والي هي الشيوعية (هيك بشكل عام)

هلق رح فسرلك ياها بطريقة تاني بالأعتماد على فكر ماركس لنفرض انو عندك مستقيم اعداد

على اليسار اخر شيئ حط الشيوعية بيجيك بعدا على اليمين نظام الأشتراكية بعدين بيجي الرأسمالية بعدين الأمبريالية بعدين بتجي المرحلة الي فوق الأمبريالة هون عاد ما بيكون في حكومة الشركات بتعمل شو ما بدا بالعالم

هلق متل ما قلتلك انا ما فيني كلشي بعرفو برد واحد انت اذا ما فهمت شي سأل وبرأيي تبلش مثلا بدراسة الشغلات الأساسية متل شو الفرق بين الرأسمالية والشيوعية وكيف بيشتغلو وشو الأبعاد السياسية تبعيتون
ماشي نشاءالله كون فهمتك بشي نص ورقة :lol:

Willi

09/02/2006, 01:53

ازا حابب تقرا شوي
فيك تفوت ع هاللينك
////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////
هوي اكتر عن اللينينية منو للماركسية ... بس كلهم بيقربوا بعض
و ازا حابب تعرف شو يعني ديالكتيك فيك تفوت لهون
////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

هدول يا سيدنا بدهون قعدة على رواق
مشكور معلم

Willi

09/02/2006, 01:56

كيف يعني عم أتخوت ما فهمت........
بعدين انت الجلطني هلق بشرفك هاي الجملة بتمثل كلشي فهمتو من كلامي

لا هاد اللي فهمتو من اللي انا اقتبستو

هلق متل ما قلتلك انا ما فيني كلشي بعرفو برد واحد انت اذا ما فهمت شي سأل وبرأيي تبلش مثلا بدراسة الشغلات الأساسية متل شو الفرق بين الرأسمالية والشيوعية وكيف بيشتغلو وشو الأبعاد السياسية تبعيتون
ماشي نشاءالله كون فهمتك بشي نص ورقة

لا معلم ردودك وردود كريمبو كافيين
انا بس حبيت اخد فكرة بسيطة عن الموضوع مو اكتر
لان كل ما بكون عم اقرا شغلة او عم اسمع شي
بيقعدو بقولو "وهون بقا منرجع للنظرية الماركسية"
اي هون انا بقا بنسطل
وانا ما بحب كون منسطل
هاي هيي القصة ومافيها

الف شكر الكون عذبتكون معي:سوريا:
يلا هاي كمان مراجعة الكون :gem:

mhmary

09/02/2006, 10:45

الف شكر الكون عذبتكون معي:سوريا:
يلا هاي كمان مراجعة الكون :gem:

له يا زلمي وين العزاب بالموضوع........
اهلين جار تعا كل يوم:سوريا: